Цалчинмур ЦIувкIуллал шяравалу цIу дуккан даву мурадрайсса чиваркIуннал ххуйсса даву дунни шяравун щин дурцуну.

Цимигу шинъя Ххяллух махIлалийсса кьулла кьавкьун, щин дакъа. ХIакьинусса кьини шяраву яхъанахъиминнал дянив яла чIявуми кулпатру ва махIлалийри бусса. Мукунма шяраваллил школа, администрациялул къатри, библиотека, медпункт. ЦIуну медпункт бувансса кIанугу тиккува ккаккан бувну бур.
Кьулла цуппагу шяравун бувххун нанисса кIанай бур, ца къаххуйсса асар бутайва шяравун буххавривухва кьавкьсса кьуллалийн ябияйхту. ХIукуматрал баннин къабавцIуну, Рамазан Щамхалов бакIчисса жагьилтал лагма лавгун, Щин-Нани-Кьунттула ( ва шярава мадарасса манзилданул архсса кIанур) дурцунни шяравун щин, ххуйсса тракторду ва аьркинсса техникагу дучIан дурну. Мийн-тийн бакъа, чирилунсса давур.
«Хаснува кIинттул ххуйсса иш къабикIайва щин дакъа, школа кьини дурккун бикIайссия. Шяраваллил агьлу барчаллагьрай бур лавайсса даражалий, сантирай ва даву дуван хIарачат бувцириннайн», – тIий бур учительница Умамат ХIусайнова.
Сантирай дурсса ва даврил хъунмур хъар ларсмагу фронтовик Мямма Щамхаловлул арс Рамазанни. Проектгу ваналли. Цувагу ччимур даву магьирну дувайсса усттарди.
ЧIирисса даву дуван чIярусса арцу аьркин хъанахъисса ва заманнай, гьай-гьай, ка кIидахIинма акъахьурча, къашайссар укунсса даву дувангу. Ва даврил спонсор ур шяравучу, ххаллилсса жагьил, амма ванал баян бунни цалла цIа кIицI малагари куну.
Вайва гьантрай шяраваллил агьлу зий бур цаймигу мюнпатсса проектирдаха. Цал уттигу кIицI лаганна, вай цинявгу чирилунсса давурттаха зузимири. Ппухълуннал Ватан ядаврил ххуллийсса захIматгу, харж дурмургу, дурцири хъиншивурттугу бусрав къархьуну къаличIайссар.

ПатIимат Рамазанова