Ва шинал апрельданий СумбатIливгу, райондалул центрданий Ваччавгу хъинну ххуйну кIицI ларгуна Амучил арс Амуттинов Михаиллул 100 шинал юбилей.

Михаил ия райондалул «Ча­ннацIуку» («Ххяххабаргъ») кказитрал редакция сакин бувмагу, ванил цалчинма редакторгу. Му хъунмасса Буттал кIанттул цIанийсса дяъвилул гьурттучи ия. Зий уссия хъинну жаваблувсса, партиялул ва хIукуматрал давур­ттай. КПСС-рал Ккуллал райкомрал кIилчинма секретарьну, райсоветрал исполкомрал председательну, СунбатIуллал колхозрал председательну, школалул муаьллимну, хьхьичIва-хьхьичI ЧIяйннал школалул муаьллимну.
Учала бурхха, «мархлун лав­хьхьуссар ккижгу дикIайсса» тIисса. Михаиллул арсру-душругу дуккавриву, давриву гьунар бусса ливчунни. Дагъусттаннай гьарманан кIулссар хъунама арс Амучил агьалинан бувмур, аьпалувун гьаннин. Мукунма шяраваллил жяматран хъинну бучIи лявкъуссар арсру Артур ва Ирбагьингу.
Артур, Санкт-Петербурглив хьхьирил академиягу бувккуну, зий уссия Гъумук кIирагу райондалул КГБ-лий, яла махъ – республикалул ФСБ-лий полковникнал чиндалуву. Ва юридий элмурдал кандидатри. ЦIана зий ур хъинну жаваблувсса даврий – Дагъусттаннал Ростехнадзорданул хъунаманугу, ЮФО-рал Ростехнадзорданул хъунаманал хъиривчувнугу.

Жаваблувсса даврий акъагу, Артурдун такIуй хъамакъариртунни буттал шяравалугу, агьалигу. Мунал хъунмасса ка-кумаг бувссар, буллайгу уссар шяраваллил жяматран. Цила чIумал силистталул органнахьхьун (хаснува шофертал, шагьрулийсса жагьилтал) ишира­хьхьун багьлагьиний, давурттай инсантал бацIайни.
ХьхьичIва захIматсса иш би­кIайва инсан ивкIусса чIумал хIавтI лакьинсса ххялчIив ххяллуя дуллай. Ва масъала щаллу буллай айивхьуссар Артур. Шагьрулия цементрал плитарду хIатталлив дичлай. Ва мудана чIарав ацIлай ур шяраваллил халкьуннал хъин кьинилучIагу, оьшивручIагу. Гьарца шинах цала харжлугърацIух хъинну тяхъану кIицI дувай­ссар 9-мур майрал байран, жяматгу бавтIун. Хъуннасса къулагъас дур шяраву бивкIу буччаврил аьдатру щаллу даврих. Шяраваллил хIатталлил лагма чапар цIу лаган дунни, дарвазагу бивзун. ХIатталлил чIарав бунни инсан игьалагайсса, гьаттал ярагъ бишайсса къатта.
ЦIана шяраву бунни ивкIунах сукIурай щябикIайсса, 100 инсан лагайсса ххаллилсса къатта, цивугу дусса гьарца шартIру: чани, щин, скамейкарду, столлу, дукра дувайсса шанхьхьуний, мукьцIалунний, чару бацIан буллалийни, гьарца аьркинмунищал­сса кухня-столовая. Газрайсса, токрайсса, тIаннуй лахъайсса пачру, къатлуя арх бакъа – хIажатхана. Гила-шилаха инсан ивкIуну шяравун лавсний, шарда, ужагърай вай шартIру анаварну щаллу дан къабигьархха. Ужагърал щаллушинна дакъанал жаназагума кIивун ласай. Гьаттай ишла буван, малланал ишла бан лавсунни дувссилул варакъи ва гунгумигу. Шяраваллил школалун на директорсса чIумал къатрал капремонт дуван хъунма­сса ка-кумаг бувссар.
Шяраваллил агьалинан, хаснува гилахсса, подписка дурну, «ЦIубарз» журнал, «Илчи» кказит бучIайссар, вагу лакрал изданиярттал редакциярдансса хъунмасса кумагри ва заманнай.
Жул хьхьичIрасса колхозрал лухIи ризкьилул фермалий «КкунцIув» 2005 шиная шиннай сакин дурну дуссар «Агрофирма», 200-нния ливчусса ризкьи бусса. Буслай бусан, чичлай чичин захIматри, кIиккусса шяраваллил хозяйство дачин даву дур ца магьлуву куннасса, чIумул тIалавшиннараха лархьхьусса гьарцагу шартIру щаллу дурсса. Да­гъусттаннайния цир, Аьрасатнавурагу духхай акъара кIикку кунна нани дурсса шяраваллил хозяйствалул даву. «Агрофирмалул» директор Адамов Насруллагь экономикалул элмурдал докторди, цувагу Артурдул ссурахъур ва щарнил уссур. КIанан кумагран Артур ур спонсоргу. Дулуннав цахьхьун цIуллушиву уттиния тихунайгу шяраваллингу, жяматрангу ка-кумаг буллансса.

МахIмуд Аьлилов