ЦIуссалакрал райондалийсса Чапаевкаллал 2-мур школалул дуклаки оьрчIру ва учительтал барча буллалисса шадлугърал линейкалий гьуртту хьунни Дагъусттаннал Предпринимательствалул ва инвестициярттал агентствалул каялувчи ХIажимурад Исрапилов. Ва школалий 561 дуклаки оьрчI ур. Цалчинмур классравун лавгун ур 40 оьрчI.
ХIажимурад Исрапиловлул, шадлугърайн бавтIцири барча буллай, кIицI лавгунни ва кьини оьрчIан дакъагу, нитти-буттан ва учительтурангу агьамсса кьини душиву, оьрчIаву школалул бивзсса гьанулул бияла хъунмасса бушиву тарбиялул ва кIулшивурттал ххуттай.
«Школалийсса шинну цукун най дурив, цукун ларгрив – гьарца дуклаки оьрчIал гихунмаймур оьрму мичча наниссар. Школа дайдихьур, гьармунил гьанур, кIулшивурттал гьану цIакьсса бизарча, кабакьу хьунтIиссар оьрчIал пиша язи бугьавриву, бизнесрал, предпринимательствалул аралуву хъит-шит учавриву. Гьаннайсса, школалул ва инсаннал гихунмайсса кьадарданул тIайланнасса дахIаву дуссар. На мудангу хIадурссара школалун ва дуклаки оьрчIан аьркинсса кумаг буван, чIарав ацIан. Жува ялун нанисса никирал цIанийру бюхъулий къуццу тIун аьркинсса, вай жулва наслур, варисталли, жулва бучIантIимурди», – увкунни ХIажимурадлул.
Ванал дакIнин бувтунни 2024 шин Аьрасатнал президент Владимир Путиннул Кулпатрал шинну баян бувну бивкIшиву.
«Ялун нанисса ник патриот зумуну тарбия давриву учительтурал ва школалул бияла хъунмассар. Дагъусттаннай цикссагу аьсрурдай бавкьуну яхъанай буссар личIи-личIисса миллатру, хасну ЦIуссалакрал райондалий. Ватандалул бакIрачIан кьини дурксса ппурттуву миллатру мудангу ца хьуну кьянкьану бавцIуссар, уттигу бацIлай буссар. ХIакьину ва линейкалий бур СВО-лий гьуртту хьумигу, гьуртту хьуминнал оьрчIругу. Вайннал хIурмат-кьиматгу жучIава лахъссар. Дуклаки оьрчIал нину-ппу ва учительтал ххари буллай битаннав!» – увкунни ХIажимурад Исрапиловлул.
ПатIимат Рамазанова
