Баян бувну бия Ххувшаврил кьини,
Зана хъанай бия аьрая саллатI.
Поездрай бучIайссар талай бивкIми тIий,
Ххаришиврул цаннан ца хъамаитлай.
Хъита тIий най бия халкь вокзалданийн:
Дунъял мукIру дурсса Ххувшаву ларсъсса,
Дяъвилий савсусса саллатIнал хьунийн,
Гитлер лахIан увсса вирттаврал хьунийн…
Цавай арсурваврал, цавай буттахъал,
Цавай ласурваврал, цавай дустурал,
Цавай уссурваврал, цавай ччиссаннал…

БархIгу тIайла буллай, ми цинявннавух,
Яргсса хъункIултIутIал кацIгу кIунттихьну,
Ца къаригу дия най щириркIуну,
Хьунаавкьуманан пиш пишкаш буллай,
Мачча-гъан чунна чин цIуххин сикъаслай,
ЧIаххув-чIарахмигу махIаттал хъанай.
Куннахь кув кьюлтIницIух щурщулий бия,
ИвкIусса арсная цIуххин къабюхълай.
Ахир кьюкьлувату дурккун ца щарсса
«Вин ххуллу бяйкьурив?» – куну цIувххуна.
– Къабяйкьунни, ттул душ, цичIавгу ххуллу,
Ттул ца арс ччувччунни дяъвилул цIарал,
Жан хIайп къаувкуну Ватандалухлу…
Вана зана хъанай вайкссава арсру,
Жунна ссайгъатиран Ххувшаву ларсун…

Поезд бацIаннинма, хIурхIа лагайхту,
Пагьламантал кунма, гьунар ххи хьусса,
Тивталну тIанкIа тIий ливккуна вирттал.
ТIутIал кацI канихьну дарцIусса къарил
Аьрая бувкI саллатI лагма лавгуна:
ДакIнил рязишиврул къазразан дурну,
Гьанавиххишиврул махъ къабуккавай,
Жиг дартIсса чIаврдайхгу ккуру нанисса
Мукьахун, пиш-пиш тIий дарцIуну дия…

Гъан хьуну ганичIан цаппара вирттал,
Зирангсса карунних хъинну ттюнгъану
Гьаз дуруна къари хIурматрал хъарайн,
Дяъвилул цIарава зана къавхьусса
Цинявппа арсваврал ца нину кунна!

Ханича Аьлиева,
ш. Ккурккул