Хас буллалиссар ряха арс аьрайн ливтIусса Хъусращиял
Валиева Баллан
Бюхттул зунттал кIанай,
Хъусрал шяраву,
Гъинтнил гъили кьини
Пашмансса хьуна.
Вирттал цачIун хьуна,
Ватан дуруччин,
Оьсса, кIусса хавар
Баллан бивкIукун.
АьтIисса чIурдугу
Баллан бивкIуна
Дяъви цирив кIулсса
Хъусрал шяраву…
Зу ци кьариртссия
Жул билаятрай,
Оьттух къаних хьусса
Германнал аьрал!
Зул бакIраву ци дур,
Ссах бур зул пикри?
Зиялий гьантIисса
Зулмулул агьлув!
Зунттаву яхьуссар
Жул мусил арсру,
Дуручлай аьдатссар
Тархъансса Ватан!
ХIачIлай вардиш хьуссар
Щаращал щинну,
Канай вардиш хьуссар
ДикIухун ххункIру!
Ца-цассагу бувкIссар
Жу мютIи буван,
Лихълахъигу бувссар
БувкIсса манзиллайх.
Миннатирттай, ххярклий
Занази бувссар,
Къаххяхханссиявхха
ТIутIигу бувну!
АьтIутIигу банну
Зулми ниттихъул,
Зулла дакъа хъуслийн
ТамахI бивхьусса.
Хьхьувай къашананну,
Шаймур буванну,
ЛухIи душман,
Гъагъан уванну.
Мюрщи-хъуни къакун,
Зунну, зананну,
Лихълахъигу анну
Аскисса душман.
Лавгссар Хъусращату
Шанттурша аслан,
Аскисса душманнал
Ас бухлаган бан…
Агь, хьуссар кулпатру
Хъусрал шяраву
Шан-шама, мукь-мукьа
Арс аьрайн лавгсса.
Буцинку душварал
Макьру руртIуссар,
Дяъвилул цIараву
Аьзизмий ливчIун!
Хьхьу-кьини къакуну,
Давурттай бивкIссар,
Ватан ххассал дуван
Думур харж дурссар!
Дяъвилул цIараву
Буттахъул талай,
Къинттуллух хъами-оьрчI
Къурдарав гъайтIий.
Хьхьувайгу, дяхттагу
Оьнма къабивкIссар,
ОьрчIшиву къаккарксса
Дяъвилул оьрчIру.
Хъунивхьу бавахъан
Жагьил хьун багьссар,
Ххисса хIарачатрай
Ххувшаву ласун.
Аьрай арсвавралгу,
Асланну талай,
Лихълахъигу бувссар
Немецнал аьрал!
Дурурччуну Ватан,
Ларсун Ххувшаву,
Чанну зана хьуссар
Шанттуршунная.
Хъун дяъвилул аьрайн
Хъусрал шярава
ТIайла увккун ивкIссар
Ца ниттил ряха…
БавтIун бивкIссар аьрайн
Ряххийлва ссайгъат
Хъусращиял Баллал –
Арсваврал ниттил.
«Буруччакьай, Аллагь,
Ттул мусил арсру!» –
Ладирзунна диркIссар
Ххув Заннайн нину.
Ххаралун бакъая,
Душман ххит анъя,
Ххаллилсса ряха арс
Дяъвилийн лавгсса.
Бухьунссия мудан
Аьрай арсругу,
Душман ххит увайхту,
Нину ккаккан ччай!
Душманнащал талай,
Щавурду дирний,
Щавурдансса дарув
Нинуй, инаяв!
Вил каних бивщусса
КIарттуву ччатIгу
ДакIнин багьайссия,
Ккашил хьутари !
Бавайя учайсса
Банмур бакъаний,
Аскисса душмантал,
Ялун бавчуний!
Дяркъу аьнтсса дуну,
Чурхру бявкъуний,
Ина лавхъсса пачъя
ДакIнин багьайсса!
Духьунссия дакIгу
Ялугьлай ниттих,
Ххассал къашай щаву
Чурххайн дирукун!
Цивппа хъуни хьусса
Буттал къаттагу
Бухьунссия тайннал
Итталух занай!
ЛивчIхьунссар яругу
Ялугьлай ниттих,
Чурххава жан дурккун
Цивппа лакьиннин…
Духьунссар рухIругу
Баллал арсварал,
Барзулт кунна, лехлай
Буттал миналий!
Духьунссар миннувух
Баллалмур рухIгу,
Вирттал був ниттихъал
БакIчину лехлай!
Гьарза баннав вирттал
Хъусрал аьрщарай
Валиевхъал аьпа
Абад ябансса!
МадихIат Амаева,
ш. Хъусращи
