РСФСР-данул лайкь хьусса артистка, ЗахIматрал ЯтIул Ттугълил ордендалул кавалер Шагьун Ибрагьимова дакIнийн бутлатисса мероприятие хьунни Лакрал театрдануву, цув дунияллийн бувккун 100 шинан хасну.
![](https://ilchi.info/wp-content/uploads/2021/12/shagun_ibragimova.jpg)
Театрданул каялувчи Бадрижат МахIаммадхIажиевал кIицI лавгуна Шагьун Ибрагьимовал щала оьрму хас бувну бивкIшиву аьзизсса театрданун. Ганил дакIнил ххаришиву ва буруккингу, оьрмулул мяънагу театр бивкIшиву. Баян бувна чIал къавхьуну хьун тIий душиву Шагьун Ибрагьимовал оьрмулун ва даврин хас бувсса буклетрал презентация.
Ккаккан дуруна «Дагъусттан» РГВК-лул зузала Хамис Шамиловал актрисан хас дурсса фильм. Муниву республикалул магьирлугърал хьхьичIунсса ишккаккулт Гулизар Султанова, Качар ХIусайнаева, Ссалам Хавчаев, Татьяна Гъазиева, Аслан МахIаммадов, Айгум Айгумов буслай бия Шагьун Ибрагьимовал бюхттулсса гьунардания, билаятрал театрал критиктурал бивщусса лавайсса кьиматрая. БакIра-бакIрах кIицI лаглай, ганил ляличIину усттарну ва дакIнийхтуну дургьусса роллу, буслай бия Шагьун Ибрагьимовал къадиркIшиву царагу чIирисса роль. Гай хIакьинусса кьининийнгу тамашачитуран ва пишакартуран дакIний лирчIун душиву. Я дянивсса, я ларайсса пишакаршиврул кIулшиву ларсун дакъанагу, Шагьун Ибрагьимова бухлай бивкIшиву цIанихсса актертурал кьюкьлувун.
Актрисащал архIал зун кьисмат хьусса театрданул зузалт дакIнийн бутлай бия Шагьун Ибрагьимовал гьарцаннах диркIшиву ниттил куннасса аякьа.
Муния махъ тамашачитуран ккаккан бувуна хьхьичIра Шагьун Ибрагьимовал Садикь МахIаммадовлущал агьамми роллу дургьуну бивкIсса «Малла Насруттин» спектакль. Шагьун Ибрагьимовал дургьуну диркIсса Жумайсатлул роль дургьуну бия Дагъусттаннал халкьуннал артистка Саният Рамазанова. Малла Насруттиннул роль — Дагъусттаннал халкьуннал артист Аслан МахIаммадов.