Мадина Аьбдулмажидова:
– БакIрайва мукIру хьунна: вакцина буван-къабуван тIий ташвишну бивкIра, кIихIуллану бивкIра, лахъину пикри буллай бивкIра. Лахьхьу-цархьхьу бував . Жул оьрчIал прививкартту дурна, ичIувагу прививкарттал агьамшивриясса ихтилатру хъанай бия, жугу вирусрая бурувччуну бикIаву мурадрай, оьрчIан ччай бия прививкартту дурну. Жагьилтал нигьа къабусласисса прививкарттая, жува, оьрмулул хъуними, циванни нигьа буслан? Ца зумату кунма циняв къашай хьумигу маслихIат буллай бия прививкартту дуван, циван чирча, прививкартту дурминнайн азар диярчагума, миннал тагьар оьнийн дагьлай дакъашиву цанма ккавккунни тIий бия . Ва ялагу, Роспотребнадзорданулгу дувара тIисса маслихIат бур, бувчIинсса мазрай буслай бур миннуя хайр бакъа зарал бакъашиву. Навагу даврий зузисса, чIявусса инсантуращал хIала-гьурттусса бухьувкун, даврилшиврий чIярусса командировкарду дикIайхьувкун, бакIран рахIатну прививка дувансса хIукму бував. Дуваннин «плюсру, минусру» хIисавравун ласав, гьай-гьай. Азардания нигь дакъа къадикIайссар, прививкалул осложнение дулаяр, азарданиясса нигь хъунни. Жулла ва ичIувацириннал, лагма-ялттуминнал цIуллушивруяр хьхьичIунсса ва язисса цичIар дакъар, бурувччуну бикIан багьлагьисса замана бур, хIакинтурал, экспертътурал тIутIимур хIисавравун ласун аьркинсса. КьатIаллил билаятирттай прививкарттащал ччалаччисса бакъар, на цIухху-бусу бував. Гьарманан чIа тIий бура цIакьсса цIуллушиву, медициналул зузалтрангу, барчаллагьрай, чIа тIий бура цIуллушиву ва ссавур! Аллагьу Тааьланалгу кабавкьуну, букканнав жува саргъунну, саламатну ва мусиватсса тагьарданува. ХIалу дагьну дунура, барча дуллай бура ва ялун нанисса ЦIусса 2022 шин. Ва пандемия дух дурсса, духларгсса шин хьуннав.
ХIадур бувссар П. Рамазановал
