Вай гьантрай МахIач­къалалив, «ЦIусса никирал шагьрулул оьрчIал ­библиотекалуву» хьунни ­Дагъусттаннал халкьуннал чичу Ссугъури Увайсов увну 90 шин шаврин хас дурсса мероприятие.

Ва тIиртIунни ва гихуннай дачин дурну ия Дагъусттаннал Чичултрал союзрал хъунаманал хъиривчу Супиян Оьмаров. Ванал бувсунни Ссугъурил оьр­мулия ва творчествалия. Мероприятиялий гьуртту хьунни Да­гъусттаннал Музыкантътурал союзрал правлениялул председатель Хан Баширов, библиотекалул хъунмур Разият Кьурбанова, МахIачкъалаллал 1-мур гимназиялул лакку мазрал учитель Шагьун ХIабиева, МахIачкъалаллал 5-мур музыкалул школалул педагогтал Диляра Аьзизова ва Наргиля ХIусайнова, библиотекалул зузалт, МахIачкъалаллал 1-мур, 13-мур, 3-мур ва 39-мур гимназиярттал дуклаки оьрчIру.

– Жула ххаллилсса шаэр Ссугъури Увайсов увну 90 шин шаврин хас дурсса мероприятияртту лахъа-хъунну дуллай бур библиотекарттаву ва цаймигу культуралул идарарттай. Мероприятиярттай гьуртту хъана­хъисса, шаэр дакIнин утан бувкIсса чансса бакъар, цанчирча ванал творчество ххирар чIявуссаннан, цувагу гьарнащал авкьусса ­инсан ия. Шаэр, чичу, таржумачи, педагог. Ссугъури Увайсов зий ия шагьрулул личIи-личIисса школардай. ХIурматрай ва ххирану ия дуклаки оьрчIан. Ва ия хIакьсса интеллигент. ­Аьчухсса, дакI хъинсса, оьрмулул хъуниминнащалгу, оьрчIащал ва жагьилминнащалгу хIал бавкьусса ия. Ттун Ссугъури чIярусса шиннардий кIулссия. ДакIний бур, ванияр 40 шинал хьхьичI, нава Ккуллал райондалул Комсомолданул комитетрал хъунамасса чIумал Ваччав ванан 50 шин хьусса юбилей дуллай. Тания шихунай ккаклай, хьунабакьлай, ттун ва ахханавагу къавхьусса куна чIалан икIайва, – увкунни Супиян Оьма­ровлул.

– Ссугъури Увайсовлул цIа личIантIиссар Дагъусттаннал литературалул, культуралул тарихраву. Ва ия дакI-аьмал хъинсса, хасиятрал авкьусса, тIул-тIабиаьт уздансса инсан. Шеърирду, проза чичаврил ­бакъассагу, ванаву бия сурат дишаврилгу гьунар. Ссугъурил кьаландалух дирхьуну дур Дагъусттаннай ххуйну кIулсса, цIа дурксса чIявусса инсантурал суратру. Гьарица суратрахунгу чивчуну бур шеъри, – увкунни Хан Башировлул.
Дуклаки оьрчIал дурккунни шаэрнал назмурду, увкунни балайрду. Цинявннан асар хьунни МахIачкъалаллал 39-мур гимназиялул дуклаки оьрчI Зураб ХIажиевлул бюххансса чIуний ва такьвалий увкусса лакрал гимн.
Ахирданий Разият Кьурбановал ва библиотекалул зузалтрал барчаллагь увкунни мероприятиялул гьурттучитурахь.

Андриана Аьбдуллаева