МахIачкъалалив, Р.ХIамзатовлул цIанийсса Миллатрал библиотекалуву, лавайсса даражалий хьунни Дагъусттаннал чичу, шаэр, драматург ЦIигьил Камаловлун 80 шин шаврин хас дурсса вечер. Шикку гьуртту хьун бувкIун бия Дагъусттаннал Чичултрал Союзрал, Лакрал театрданул, радиолул, личIи-личIисса министерстварттал ва ведомстварттал вакилтал, шаэрнал уссу-ссу, гъан-маччами, КIулушацIрал жямат. Бачин бувну ия мажлис Дагъусттаннал Чичултрал Союзрал лакрал секциялул хъунама Супиян Оьмаров.
ЦIигьил Камаловлул оьрмулия ва творчестволия бусласисса ихтилат бунни Дагъусттаннал халкьуннал чичу Хизри Ильясовлул. Ванал бувсунни ЦIигьиллул ва цала дусшиву Москавлив, Литературалул институтраву дайдирхьушиву, цала дусшиврия цаппара чичултрал хъярчийсса хавардугума чивчуну бушиву, ЧIаящиял Ибрагьиннул «Комедиант» тIисса луттиравугу буккин хьунтIишиву цаятувасса хавар.
ЦIигьил Камалов увну ур 1943 шинал КIулушацIрал шяраву. Школа къуртал бувну махъ зий ивкIун ур личIи-личIисса давурттай. Заводрай зузисса чIумал ванал чивчуну бур захIматкашнахасса шеърирду. Миннуву автор бюхттул буллай ур инсаннал захIмат. Хъунмасса кIану бугьлай бур ЦIигьиллул творчестволуву Буттал кIанттул цIанийсса Хъунмасса дяъвилун хас бувсса произведениярттал. Аьралуннаву къуллугъ бувну увкIун махъ ЦIигьил зий ивкIун ур охотинспекторну. Ми шиннардий ванан ххуйну кIул хьуну дур зунттал кIанттул кьянкьасса тIабиаьт ва жанавартрал хасиятру. Мичча нанисса бур «Мусил хъиртту» тIисса оьрчIансса ванал лугу. Вай хавардал гъан дуллай дур ЦIигьиллул творчество Иван Тургеневлул произведениярттачIан. ОьрчIансса хаварду бакъассагу, ЦIигьиллул чивчуну бур «БурцIил кьацIливу» тIисса романгу. Ванийн учин бучIир роман-эссе куну. Ва роман бивщуну бур 1990-ку шинал «Литературалул Дагъусттан» журналданий.
1980-ку шиннардий ЦIигьиллул къуртал бувну бур А.М. Горькийл цIанийсса Литературалул институтрал лавайсса литературалул курсру (ВЛК). ЦIигьиллул чивчуну бур кIива шеърирдал жуж: «ЩатIив» ва «Вирхху».
Драматург хIисаврай ва кIулну ур жуна шанма пьесалийну: шеърирдайсса драма «Кьадар», «Цалчинсса хъарас» ва «Интикьам». Яла хъунмур кIану ванал пьесардаву бугьлай бур Хан-Муртазаьлил каялувшиндаралу зунттал халкьуннал Надир-шагьнащалсса дяъвилуву ларсъсса ххувшаврин хас бувсса «Интикьам» тIисса драмалул.
ЦIигьил Камалов дакIнийн утлатисса, ванал творчестволия бусласисса ихтилатру бунни филологиялул элмурдал кандидат Ххазина Аминовал, географиялул элмурдал доктор, профессор Шагьимардан Мудуевлул, шаэр Алексей ХIажиевлул, ГТРК-лул лакрал вещаниелул редактор Тамара Закарьяевал, АьФ-лул ХIурматлувсса архитектор Увайс Камаловлул, химиялул элмурдал кандидат Оьмари МахIаммадовичлул, библиотекалул отделданул каялувчи Сарат Аьбдуллаевал.
Цила ппу дакIнийн утан бувкIсса цинявннахь барчаллагь увкунни ЦIигьиллул душнил Заирал. Ва цуппагу Кувейтрай хIакинну зий буссар. Мукунма ЦIигьил дакIнийн утлатисса, мероприятиелул сакиншинначитурахь, шиккун бувкIминнахь барчаллагь тIисса ихтилат бунни шаэрнал уссил Батирдул. Ванал бувсунни «БурцIил кьацIливу» тIисса роман чичлай ЦIигьиллул 10 шин хьушиву, ацIва бутIуяту кIива бакъа якъавхьушиву.
– КIива бутIа бувкссия «ЦIубарз» журналданий, гайми къабуллуна уссил щала луну итабакьин ччай ура тIий. Якъавхьусса бутIраву бия 60-70 лажиндарайсса Ккурккуллал Щазаясса бутIа. На га бувккуссия, хъинну бюхханну чивчуну бия, – кунни ванал.
ЦIигьиллул шеърирду бувккунни ванал шяравучув, Дагъусттаннал лайкь хьусса артист Аьбдул Мурадовлул. Шаэрнал мукъурттийсса балайрду увкунни Дагъусттаннал халкьуннал артист ХIажиаьли ХIажиаьлиевлул, Дагъусттаннал искусстволул лайкь хьусса зузала Жанна Кьурбановал. Мажлис къуртал хьунни шаэрнал гъанчув, Дагъусттаннал халкьуннал артист МухIсин Камаловлул щаллу бувсса лакрал гимнрайну.
