Августрал махъсса 10-15 гьантта оьрчIангу, миннал нитти-буттангу ца яла аварасса, авазасса ва жипайхгу, кисрайхгу рищайсса шайшиву жунма гьарнан кIулли. ОьрчIал цIуллу-сагъшиврул цIаний ххуймур портфельгу, ччаннайн лаххансса бурчул усругу, чурххан тIааьнсса ва гъилисса ппалул, паммалул гьухъа-хIажакирттах дулунсса арцуйгу мяш къахьунмур бувай нитти-буттахъал дарсирайн бачин хьхьичI. Ххуймур, дучIимур ласлайру тIий, цал-цал бяйкьунугу лякъай.
Бурганну школалийн бачин хьхьичI жула оьрчIан ци ласун маслихIат буллай бурив Росстандартрал пишакартал.

Портфель ласайни

Дуклаки оьрчIал ишла дан ласайсса гьарца затрал – порфельдания тIайла хьуну, дневникрайн, тетрадьрайн бияннин кьамул дурну дуссар Евразийскаллал экономикалул союзрал сакин дурсса «ОьрчIал ва балугъравун къабивсса оьрчIал цIуллу-сагъшиврун ни­гьачIишиву да­къасса хъус-матахI» тIисса, техникийсса регламент. Муна му регламентрайн бувну, масалдаран, оьрчIансса гьарца портфельданий дикIан аьркинссар цинявннан аьмсса ТР ТС 007/2011 тIисса маркеровка. Ва аьш да­къасса, мукунна муний чивчуну бикIан аьркинссар га портфель бувсса материалданул цIа ва ци оьрмулул шинну дикIан аьркинссарив чIава муштаринан. Портфель машан ласайни, къулагъас дан аьркинссар оьрчIал бурхIай лавхъмур рюкзакрал чул кьянкьасса ягу кIукIлусса бушиврух. ТIалавшиннардайн бувну, га аьркинссар бурхIан тIааьнну бикIаншиврул кьянкьасса материалдания бувсса.
Мюрщи классирттавун заназисса оьрчIан машан ласун аьркинссар 700 граммраяр къакIусса портфель, рюкзак. Дянивми ва хъуними классирттаву дуклакиминнан тIурча, ца килограммраяр къакIусса. Мюрщултран машан ласун ккаккан бувсса порфельданул лахъшиву дикIан бучIину бур 30-36 см.

Луттирду ва дарсирдансса мюрш-кьюрш ласайни

ХIакьину луттирдал ва тетрадирттал, дневникирттал, сурат дишинсса альбомру, кьаламру ва цаймигу мюрш-кьюрш базардаву лап яргсса ва ччимур журалул дур. ОьрчIан царай ххуй дизлай, царайннуйгу дакI къадакьлай занай бухьурчагу, миккугу нитти-буттал къулагъас дан аьркин­ссар гайннул качествалух ва гай дурсса материаллах.
Порфельдануву салкьи дур­сса луттирдал ва чичу-буккулул хъуслил кIушиву тIурча дикIан аьркинну дур:
1-2-ми классирттаву дуклакиминнан – 1,5 кг. къакIусса;
3-4-ми классирттан – 2 кг. къакIусса;
5-6-ми классирттан – 2,5 кг. къакIусса;
7-8-ми классирттан – 3,5 кг. къакIусса;
9-11-ми классирттан – 4 кг. къакIусса.

Дарс дайни щябикIансса кIану

Шаппа оьрч1ру дарсирдах щябитан ласун ккаккан був­сса стол, кIантту ласаврил низамгу мура Евразийскаллал союзрал кьамул дурсса регламентрах бурувгун, маслихIат буллай бур, оьрчIан цими шин дурив хIисавну, ва ганал чурххал лахъшиврух бурувгун аьркин­сса матахI ласун. Столданух кьус ивкIун дарс дуллай тIий хъуна хьувкун, бурхIал азарду ялун къаличиншиврул аьркинну бур ГОСТ-рал кьараллайн бувну, стол ва кIанугу ласун. Бурган аьркин­ссар гай бувсса материалданух ва ялтту бувксса сирданух.

Янна-уссацIунсса ца-кIива маслихIат

Школьный формалул хIа­къиравусса мура регламентрал ккаккан дурсса маркеровкалийгу чивчуну бикIан аьркинссар форма дурсса, дурур­ххусса хIукуматрал цIа, предприятиялул ва му даххан ларсминнал цIа-бакI. Чара бакъа ги­кку чивчуну бикIан аьркинссар цуми шиннардивусса оьрчIан бучIиссарив машан ласун, га гьухъа-хIажак дурурххусса шин, барз, синтетикалул, ппалул, паммалул цими процент буссарив, ганил размер ва шюшайни ишла бансса маслихIатру.
Пишакартурал масли­хIатир­ттайн бувну, гъухъа-хIажакраву чIявусса процентру синтетикалул бур тIутIавугу къатIайласса бур. Гай бушивруягу цаппара янна-уссаву зарал бакъасса бур. Масалдаран, чIяруну шюшин багьайсса спортивный форма. Синтетика гьарзасса янна хъунмасса хIаллай дияйсса дур ва циксса шюшларчагу зия къашайсса дур.