МахIачкъалалив щапI куну бувцIусса «Россия – моя история» тIисса тарихийсса паркрал залдануву хьунни Гумбетуллал райондалийсса Инхо шяравасса щайхнал АьбдулхIамид Апаннинал оьрмулул ххуллия, ванал рувхIанийсса ирс-ххазиналия бусласисса «Идавсил ирс» («Наследие Пророка») тIисса документал журалул куносуратрал премьера. 

ННТ-лул директор Микаил Микаиловлул бувсунни киносурат ларсшиву аьлимчунал буттал шяраву, ва ххуйну кIулну бивкIцириннахьгу цIухху-бусу бувну. Киносуратрал гьанумур мурадгу, жагьилтуран рувхIанийсса ирс-ххазинарду, ппухълуннал мяърипат хьхьичIунну душиву ккаккан баву бушиву. АьбдулхIамид Апанни цукунсса инсан ивкIссарив бувсун, ванал оьрмулул эбратрайну ккаккан бувну, презентациялийн бавтIцириннал лахъсса кьимат бивщунни ва даврин. Ванил режиссер ур Рашид ХIажиев, сценарийлул автортал – Аьйша Къарагишиева ва Басират ­Аьлишаева.
Басират, жуна цинявннан ххуйну кIулсса , 2008 шинал сентябрьданий шагьидну дунияллия лавгсса, ШавкIратусса журналист Аьбдуллагь Аьлишаевлул душри. ДакIнин бутанну, ва республикалий вагьабизмалущал талай ивкIсса ца яла цIакьма журналист ивкIшиву, «ТВ-Чиркей» исламрал телеканалданий тамансса передачартту дачин дурмагу, авторгу ивкIшиву. Цила чIумал биялсса аваза бувтссия ва уртакьну хIадур дурсса, вагьабизм дащуй дихьлахьисса документал журалул киносуратирттал. Вана утти буттал пиша язи бувгьусса Басиратгу, ННТ-лийгу зий, Дагъусттаннал гуманитар институтравугу журналистикалул факультетрай дуклай бур.
Аьбдуллагь Аьлишаевлущалгу кIул хьуну, ванал макьалартту «Илчилийгу» ришлан икьрал дурссия, навагу исламрал темалуха зий бухьувкун кказитрай. Амма цаппара хIаллава ва оьрмулуцIа увна, жагьилсса, гьунар бусса ва сивсусса журналистнал бивкIу ттун хъинну кьувтIуна.
Ванил укун бувсунни киносуратрал хIакъираву: «Жун пикри хьуна Дагъусттаннал рувхIанийсса насихIатчитурая передачартту дуллан. Ччай бия оьрму диндалул ххуллий гьан бувсса ва цивппа дунияллия лавгун мукьахгу рувхIанийсса ирс-ххазина кьабивтсса инсантурая бусан. Дайдихьу дуварду АьбдулхIамид Апанниная. Ва хъунасса аьлимчу, рувхIанийсса насихIатчи акъагу, уттисса муфти АхIмад Апаннинал ттаттагу ухьувкун, ванаяту дайдихьу дувансса пикри бувссия. Жу чIярусса материаллу ххилтIу дуварду, динчинал оьрмулул ххуллия бусаврийну гьашиву къадурну, ганал оьрмулул кьимат чIалачIи буваншиврул, га ккавксса, ганащал хIала-гьурттуну бивкIминнан цукунсса инсанну дакIний ливчIун урив ккаккан бувну. Ва киносурат агьалинан мюнпатрансса хьунссар тIий бура».
Муфтинал маслихIатчи ­Айна ХIамзатовалгу кIицI лавгунни гьашину ва зуруй Аьбдуллагь Аьлишаев радикалтурал оьрмулуцIа увну 18 шин ларгшиву, ванал душнил Басиратлул цалчинсса киносурат накьшибанди тарикьатрал щайхнан АьбдулхIамид Апаннинан хас давугу хIисавравун ласунсса иш бушиву, Аьбдуллагь душнийхчIин жучIана зана хьусса кунмасса асар цивува бушиву.
ДакIнийхтуну барча буллай буру жугу, Басиратгу, ванил уртакьталгу, чIа тIий буру уттиния тинмайгу дуллалимуниву тIайлабацIу.

Лажин хIадур дурссар ПатIимат Рамазановал