Цуксса кьурчIинугу, гьарца кьини, Ватандалул мурадру буручлай, жанну дуллай бур жулва жагьилтал, щархъаву ва шагьрурдай хъанай дур вайннал аьпалунсса батIавуртту. Вай гьантрай ГьунчIукьатIрал шяраву «Ушедшим и живым с благодарностью» тIисса мемориалданий тIиртIунни ца ттигу къучагънансса – Аьлиев Жамалуттин Маммабуттал арснансса аьпалул ула.
БатIаврил дайдихьу дуллалисса махъ лавхъунни ГьунчIукьатIрал дянивмур даражалул школалул директор Малик Къушиевлул. Хъирив ихтилат бунни Дагъусттан Республикалул Транспортрал ва ххуллул хозяйствалул министерствалул паччахIлугърал закупкарттал отделданул начальник Зиябуттин ХIажимирзаевлул, Лакрал райондалул администрациялул чулуха – КьурбанмахIаммад Дандамаевлул. Ихтилатру мукунма бунни ГьунчIукьатIрал шяраваллил бакIчи МухIад Штанчаевлул, щарнил жагьилтурал чулуха – «Дом знаний» онлайн-школалул директор Халипа ТIагьировлул, гъан-маччаминнал чулуха – Саида Касаевал. Гьарцагу ихтилатчинал бия къучагъная бусанмур, ванацIун дархIусса дакIнинбичавуртту. Цинявнналагу мурадгу ца бия – шяравусса мемориал комплексрайсса ттизаманнул вирттавран хас бувсса аьпалул чIирайсса суратирттал аьдад вания тийннай хъунна къашаву, ттинин Ватандалухлу жанну дуллуминная тIий личIаву, СВО-гу къуртал хьуну, чиваркI цалва-цалва кулпатирттавун, нитти-буттачIан цIуллуну-сагъну зана шаву.
Бюххансса, асар хьунсса бия Жамалуттиннул душнил, ПатIиматлул, бувсса ихтилат. Ванил барчаллагь увкунни цалва кулпатрал чIарав бацIаву дурминнахь, хаснува ва даврил сиптачи Зиябуттин ХIажимирзаевлухь ва цала гъанчув Салим Шуаьевлухь. Цила ппу дакIнин утлай, ПатIиматлул кIицI лавгунни Жамалуттин ивкIшиву ххаллилсса ппугу, ласгу, хъинсса дакIнил заллугу, цаятура кьянкьасса жаваблувшинна дусса, цIу буну хъярч бувайсса, аьркинний чIарав ацIайсса инсангу, иш багьний жан дулун махъунай къавхьусса виричувгу. Бувсунни Жамалуттин 2022-ку шинал ссуттил лавгшиву СВО-райн, вара шинал декабрьданий диршиву ванайн захIматсса щаву ва Москавлив операция бувшиву, амма реабилитация щаллу хьуннин цIунилгу лавгшиву аьрайн. Буттахасса назмугу дурккуну, душнил кIицI лавгунни ва сагъну акъашиврийн вихну бакъашиву, цуппа мудангу ванах ялугьлантIишиву.
ГьунчIукьатIрал школалул дуклаки оьрчIал хIадур бувну бия хъинну ххуйсса номерду. Вайннуя махъ аьпалул ула тIиртIунни Жамалуттиннул щащарнил, Зульфирал, ва душнил, ПатIиматлул. Жамалуттин Аьлиев увну ур 1973-ку шинал. Виричувну жан дуллуну дур 2024-ку шинал июньдалул 14-нний Запорожскаллал направлениялий. Аьпалул хьуну махъ дуллуну дур Чувшиврул орден.
Шиккува кIицI лаган, ГьунчIукьатIрал шяраву дацIан дурсса Мемориал комплексрай чирчуну дуссар Буттал кIанттул цIанийсса Хъунмасса дяъвилийн лавгсса цинявнналагу цIарду. Шиккува буссар дяъвилул чIумал шяраваллил хъаннил бувсса хъунмасса захIматран, захIматрал виричувшиврун хас бувсса чIира. Буссар щарнилгу, райондалулгу, республикалулгу цIа машгьур дурсса хьхьичIунсса инсантуран хас бувсса чIира. Буссар ттизаманнул вирттавран хас бувсса чIирагу. Ва чIирайсса аьпалул ултти цала сипталийну, харж-хуржгу цала бакIрайн ларсун, тIиртIуссар Зиябуттин ХIажимирзаевлул. Ва ххуллухьсса ула ва чIирай шамилчинмур хъанай дур. СВО-рай ттигъанну жан дуллусса ца ттигу жагьилнангу тIитIинтIиссар ула цахъис махъату. Лавайгу увкусса куццуй, ванийну гьашиву хьуннав, ахир дучIаннав нязаннийсса бивкIурдал. Шяраваллал ва миллатрал патриотътурангу так ххуймунил-хъинмунил цIаний захIмат буллан багьаваннав.
Бадрижамал Аьлиева
