Ларгсса ххуллункьини МахIачкъалалив, Хъусращиял шяравасса физикалул ва математикалул элмурдал кандидатнал, Саэдлул арснал Мусал ва философиялул элмурдал доктор, Ваччатусса МахIаммадлул душнил Асият Буттаевхъал ужагърай хъуннасса уттарашинна дия. Асият Буттаевал 75 шинал юбилей барча дуван бавтIун бия ванил даврил уртакьтал, дустал, Мариян Илиясовал цIанийсса «Дараччилул» душру, СМИ-лул вакилтал. 

БакIрайва кIицI лаган, юбилей барча дуван тIювайн батIавривугу дия ххуйшиву, хъамал ичIува хъин битайсса ппухълуннал аьдатгу хьхьичIну. ТIювагу дур вайннал тамашану ххуйсса, жулла зунттал къатрал журалийсса. Ларзугу дия Лаккуй куннасса. Гьарца къатта личIину ласурча, тавханттун хIисав буван бучIия. ХьхьичIазаманнул тIахни-кIичIу, матахI, кьай-кьуй, авадансса, кьиматрайсса библиотека, я щуналва аьлимчунал, дурккучунал ужагъ бур учин кунмасса. Аякьалий, хIурматрай ябуллалисса багъ ва жура-журасса тIутIив. Укун аьжаивну ххуйсса, я бацIансса, ппухълуннал тарихрая бувагу ят къабувцун яхъанахъисса Муса Саэдович ва Асият МахIаммадовна циван къабикIави агьалинан ххирасса ва бусравсса.

ЧIявусса увкунни Асият МахIаммадовнал хIалал бувсса барчаллагьрайсса махъру. Мажлис муданма кунма усттарну бачин бувсса, Дагъусттаннал бакIчинал Бугьараминнал советрал член, жяматийсса ишккакку, публицист Шалласу Шалласуевлул кIиц лавгунни Асият Буттаева республикалул хъанниву цалчин философиялул элмурдал докторнал цIа ларсъсса бушиву, ва ччя-ччяни цайми регионнаясса имамтуращал, динчитуращал-аьлимтуращал хьунабакьайшиву. КуртIсса калимарттайну, аькьилсса пикрирдайну агьали чанначIан кIункIу буллалисса бушиву.

Ваччиял шяраваллил Гьарун Саэдовлул цIанийсса фондрал каялувчи Давди Увайсовлул, жяматрал цIанияту барча буллали­сса адресгу дуллуну, кIицI лавгунни шяравудушнил хIурматгу, авторитетгу хъуннасса душиврия мудангу пахрулий бикIайшиву. Ва мудангу гъирарай хIала буххайшиву шяраваллил жяматрал оьрмулул иширттавух.
Ванил даврил уртакь, теолог, исламрал элмулул дунияллий хьхьичIунминнал сияхIрай лайкьсса кIану бувгьусса ХIасан ХIасановлул кIицI лавгунни Асият МахIаммадовна чIярусса шиннардий Дагъусттаннал Гуманитар институтраву философия лахьхьин дуллалисса ца цIакьмур чул бищай ттарцI бушиву, кIицI лавгсса вузраву теологиялул направление Аьрасатнаву ца яла хьхьичIунмур душиву.
«Ванил каялувшиврийну ДГИ-лул теологиялул ва социал гуманитар дисциплинардал кафедра хъуннасса элмийсса хъар ларсун зий буссар. Асият МахIаммадовнал хIадур бувссар исламрал элмурдал доктортал. Дагъусттаннай цалчинми хъанахъисса цивппагу. Ванил элмийсса интересру бавхIуну буссар Дагъусттаннал рувхIанийсса ирс буруччаврицIун, диннугу, культурагу, миллатругу личIи къабуллай, бавкьуну яхъанан аьркиншивруцIун. Аьратталсса тагьарду дусса ппурттувугу ванил мукъул бияла хъунмассар. ЮНЕСКО-лул кафедралул профессорнугу зий буссар, Ухссавнил Ккавкказуллал рувхIанийсса эбадатирттал ва культуралул, диннал дянивсса диалограл хъиривлаявуртту дуллай», – увкунни ванал.

Узбакисттаннавасса хъамаличу, Дагъусттаннал тийхсса диаспоралул бакIчи Щамххалов Гьаруннул бувсунни Асият Буттаева исламрал аьлимтуращал Узбакисттаннайн бучIайхту, тийхсса дагъусттанлувтуран хъуннасса байран хьушиву.
Гульшан Хасаевал кIицI лавгунни, Асият Буттаева кунма элмулухун, кIулшивуртту дулаврихун машхул хьусса, жула бучIантIимунил цIаний зий, захIмат буллалисса хъамитайпалул чIарав Муса Саэдович куна, аякьалийсса лас ушивугу хъунмасса тIайлабацIулунсса иш бушиву, ванал кулпатрахьсса жуаврдугу, калимартту хIурматрал дурцIусса душиву.
Чичу, шаэр, публицист, ДГТУ-лул кьатIаллил билаятирттал кафедралул профессор Жанна Абуевалгу чIурчIав дунни цуппа барчаллагьрай бикIайшиврий гьарца чулуха итххявхсса Асият Буттаева оьрмулул ххуллий хьунабакьаврийн.
Шаэр, публицист, А.А. Тахо-Годил цIанийсса элмийсса Педагогикалул институтрал оьрус мазрал ва литературалул секторданул хъунмур сотрудник Миясат Муслимовал кIицI лавгунни Асият МахIаммадовнал кIулшивуртту, аькьилшиву, дакI хъиншиву лагма-ялттуцириннан мюнпатну дурсса давуртту чIявучин эбратранну душиву.

Юбиляр барча буллалисса ихтилатру бувна Дагъусттаннал Транспортрал ва ххуллурдал хозяйствалул министерствалул отделданул каялувчи Зиябуттин ХIажимирзаевлул, Дагъусттаннал Национал библиотекалул хъунаманал хъиривмур Сарат Жабраиловал, «Дагъусттан» ГТРК-лул лакрал редакциялул хъунмур Тамара Закарьяевал, шаэр Илияс МахIаммадовлул, виваллил иширттал органнай зузисса ХIажиев МахIаммад-Расуллул, «Лезгинка» ансамбльданул хореографиялул школа-студиялул каялувчи Тарият Къапиевал, Федерал казначействалий зузисса Валида ХIажимирзаевал, «Новотек» ООО-лул гендиректор ХIажи Ссунгъуровлул, педагог МахIаммад Исяевлул, «Илчилул» журналист Имара Саидовал, жяматийсса ишккакку Мариян Аьлиевал.

Мажлис чIюлу бувна Дагъусттаннал халкьуннал артистка Жанна Кьурбановал ва бювхъусса чIунил, такьвалул заллу Илияс МахIаммадовлул. Балай учаврил гьунаргу бусса Асият Буттаевал цилвами балайрдугу бавтIцириннан хъинсса бахшишрунугу хьуна.
Ниттил маз ххирасса амудада ва ттатта ххари буван, вайннал душнил оьрчIалгу итабавкьуна лакку мазрайсса балай.
Ца зумату кунма, циняв бия оьрмулухун дакIний личIансса, аслийсса лакрал ужагърай хIакьсса лакку шадлугъ хьунни тIий.

Кулпат лахъа-хъун буван бавтIцириннахь барчаллагь тIий, Муса Саэдовичлул кIицI лавгунни Асият МахIаммадовна танийва, цивппагу личIину ччаннай бацIан бувасса ппурттуву, кьатIаллил билаятирттаясса студентътал шаппай бувцуну бучIайсса бивкIшиву, гъурбатрайсса вайннахь ччатI бишинну тIий, хIакьинусса кьинигу барчаллагьрайнма бушиву тай инсантал. Мукунма, студентътурал, аспирантътурал давурттан рецензияртту чичайшиву багьагу къалавсун, циятувасса кумаг бикIувча тIий.
Цал уттигу тикрал буван, Асият Буттаева, ссаха зурчангу, цумур региондалийн биярчангу, буний гъилишиврул ва хъиншиврул нур кьаритлатисса инсан бур. Гьаннайсса, инсаннал яла язими хасиятирттал уртакь бур.
Уттиния тинмайгу вава бюхъулий, шавкьирай агьалинал дакIурдивун хъиншиврул гьанна бичлай, рувхIанийсса чаннайну дуниял чIюлу дуллантIишиврийнгу цукунчIавсса щак бакъар.

Ва тIааьнсса хьхьуну увкуцири хъин-хъинсса мукъурттицIунгу бакьлай, цал уттигу юбилей барча дуллай, чIа учинну жувагу Муса ва Асият Буттаевхъал кулпатран, оьрмулуву чIяру-чIярусса ххаришивуртту, хъиншивуртту, наслулул ва цанма ххираминнал дянив цIуллусса, ххарисса оьрмулул чIярусса шинну.