Январьданул 14-нний М. Горькийл цIанийсса Оьруснал театрданул Хъунмур залдануву хьунни ххачпараснал агьалинал агьамми байраннавасса ца – «Рождество Христово». Ванил сакиншинначиталну бия МахIачкъалаллал епархия, Дагъусттан Республикалул Миллатрал политикалул ва диннал иширттал министерство ва Культуралул министерство.
Байрандалийн батIлатIими театрданул жанахIраву хьунабакьлай бия Каспийскаллал флотилиялул оркестр ва оьруснал халкьуннал балайлул «Волна» цIанилусса ансамбль.
Шадлугърайсса батIаву дайдирхьуна МахIачкъалаллал ва Грозналлал архиепископ Варлаамлул. Цалва ихтилатраву ванал чIурчIав дурна ва байрандалул куртIсса мяъналий, цува ххарину ушиврий залдануву личIи-личIисса конфессиярттал инсантал буну, кIицI лавгуна, дин, миллат личIи бакъа, цинявннал мурадгу, хиялгу бушиву дунияллийн дакьаву ва нахIушиву ликкаву.
Дагъусттан Республикалул ХIукуматрал председатель Аьбдулмуслим Аьбдулмуслимовлул, цалва цIаниягу барча бувну ххачпарас, дурккуна Республикалул бакIчи Сергей Меликовлул цIаниясса барча баву. Хъирив вайннал кIинналагу дунияллул халкьуннал дянивсса «Красота божьего мира» тIисса цIанилусса конкурсрай ххув хьусса оьрчIан буллуна дипломру ва бахшишру. Мукунма МахIачкъалаллал епархиялул чулухасса Барчаллагьрал чагъардайну ва бахшиширттайну кIицI лавгуна «Батюшка» тIисса цIанилусса документал фильм ласлай республикалул журналистътурал бивхьусса захIмат. Ва кьини ва журалул бахшишру ларсминнавух бия «Дагъусттан» РГВК-лул редактор, жулва лаккудуш, Цалчинмур ЦIувкIуллал шяравасса Лиана Парчуевагу. «Батюшка» дур ларгсса шинал Дарбантлив терактраву оьрмулуцIа хьусса Отец Николайлуясса фильм.
Ххачпарас диндалул агьали барча буван сахIналийн лавхъуна Дагъусттаннал Муфтиятрал ва Ягьудийнал общиналул вакилталгу.
ЛичIи-личIисса диннал ва миллатирттал инсантал ялапар хъанахъисса Дагъусттаннай байранну цачIу кIицI лагаву ччяниярасса аьдат дур. Ва ххуллухьгу мукунна, байран ххачпараснал дунугу, сахIналийгу, залданувугу къачансса бия ислам диндалул агьлу, мукунма ягьудийналссагу.
МахIачкъала, Каспийск, Дарбант, Къизлар шагьрурдал воскресный школардайн заназисса оьрчIал ккаккан бувна «Светлый праздник Рождества» цIанилусса музыкалул композиция.
Ахирданий А. Къапиевлул цIанийсса Лакрал музыкалул ва драмалул театрданул актертурал ккаккан бувна «Приключения Буратино».
Байрандалия бувккун нанисса оьрчIайх дарчIуна Рождестволул бахшишру.
Бадрижамал Аьлиева
