Ноябрьданул 22-нний журналистътуращал хьунаавкьунни Дагъусттаннал Ветеринариялул комитетрал каялувчи МахIаммад Шапиев. Ванал бусаврийну, гьашину 9 зурул мутталий 67,6 млн бакI ризкьинул зана-кьала (обработка) бувну бур ва диагностикалул идарарттай дурну дур 4,7 ахттар бавурту.

«Аьмну 9 зурул давурттал хIасиллу дуллай, кIицI буван аьркиннсса зат бур республикалул ветеринариялул къуллугърал хъуннасса даву дурну душиву эпизоотикалул тагьар ххуй – хъин даву мурадрай. Ми давуртту бартдигьаврийну республикалий ппив хьун дартун дакъар хъинну нигьачIаву дусса азарду: сибирдал язва ва ящур, лахъай азар узелковый дерматит, туберкулез, дунгъузирттал африканал чума, яттил ва цIурттал оспа, лелуххантрал грипп ва цаймигу»,- кунни Шапиевлул.

Ванал тIимунийну, гьашину мартрал 29-нний хьуну дур ДР-лул ХIукуматрал противоэпизотикалул комиссиялул батIаву, муний ххал бивгьуну бур Гъанмур машрикьуллал билаятирттай ппив хьуну бивкIсса серотип САТ-2 ящурданул вирус жучIанма бучIаврил хьхьичIалу кьукьаврил давурттал масъала.

Гьашинугу хьуну дурр мува комиссиялул кIира батIаву, миннуйгу ххал бивгьуну бур республикалийн лелуххантрал грипп ва яттил оьцIалу дучIаврил хьхьичIалу кьукьинсса давурттал масъала. Мукунма майрайгу хьуну дур мува комиссиялул ярглий дакъааса батIаву, муний ххал бивгьуну бур инсантал бруцеллезрал къашавай шаврил масъала.
«Гьашину 9 зуруй профилактиклул ва диагностикалул плпндалий ккаккан дурсса циняв давуртту бартдиргьуссар. ХIакьину республикалун яла хъунмур нигьачIаву диян дуллай дур яттил оьцIаллил. ЦIанасса ппурттуву му азар ппив хьуну дур Къалмукьнаву, Ставрополлал, Ростовуллал, Ашттарханнал, Волгоградуллал улкрай»,- кунни Шапиевлул.

Ваналь бувсунни мукунма ялун нанисса шинал дуван аьркинсса давурттаягу.
Миннувату яла агьаммур даву хъанай дур личIинура нигьачIаву дусса лахъай азардал кюрттив хIасул хьун къабитаву. Муниха зийгу бур.

ХIасан Аьдилов.