Январданул 27-нний ДР-лул БакIчинал ва ХIукуматрал Администрациялул каялувчи МахIач Оьмаровлул дунни «Зунттал къучагъшиву» («Доблесть гор») тIисса республикалул лябуккулул программалувусса мероприятияртту дайдишаврин хасъсса зузи группалул цалчинсса заседание.
Программа дузал дурну дур региондалул бакIчинал. Ва программа хъанахъиссар «Вирттаврал чIун» («Время героев») тIисса федерал программа куннасса жула региондалулмур программа (аналог). Ва бартдигьлагьиссар Аьрасатнал президент Владимир Путиннул сипталийну ва хъанахъиссар СВО-лул пагьму-гьунар бусса гьурттучитурацIун кабакьулунсса ца яла хъунмур проект.
Федерал программалул цалчинмур потокрал финалистътал уттигу дуклайнма бур, ми хIадур буллай бур федерал ва региондалул даражалий жаваблувсса паччахIлугърал къуллугъирттай зун.
Президентнал программалийсса дуккаву къуртал дурминнавасса ца ур дагъусттанлув – Аьрасатнал Виричу Темирлан АбутIалимов. ЦIанасса ппурттуву ва ур стажировкалий ДР-лул БакIчинал ва ХIукуматрал Администрациялий региондалул бакIчинал каялувшиврийну.
Федерал программа щурущи дурну махъ Республикалул каялувчинал тапшур бунни укунсса программа бартдигьин региондалул даражалийгу.
— Зун цинявннан кIулссар, цукунсса къулагъас дуллай буссарив хасъсса аьралий операциялул гьурттучитурацIун кабакьулул масъаларттах. СВО-лий гьуртту хъанахъисса дагъусттанлувтуравасса чIявуминнан ччай бур зун паччахIлугърал ва муниципал управлениялуву. Микку зуншиврул, хасъсса кIулшиву дикIан аьркинни. Жула хъунмур масъалану хъанахъиссар проект бартдигьавриву щаллу дуван тIайлашиву ва аьчухшиву, – увкунни МахIач Оьмаровлул.
Программалул мероприятияртту хIадур даврил хIакъираву бувсунни ДР-лул БакIчинал ПаччахIлугърал къуллугърал, кадрардал ва паччахIлугърал наградарттал управлениялул хъунмур Земфира Къашкъаевал. Ванил тIимунийну, программалул хъунмур мурад хъанай бур Дагъусттаннаясса СВО-лул гьурттучитурава ва ветерантурава батIул баву лавайсса даражалул управлениялул потенциал буми ва мукунма ми хIадур баву личIи-личIисса даражардал республикалул идарарттаву зун.
Региондалул цифралул лябуккулул министр Юрий ХIамзатовлул, ДР-лул БакIчинал Администрациялул каялувчинал хъиривчу – ДР-лул БакIчинал Информациялул политикалул ва прессалул къуллугърал управлениялул каялувчи Рашид Акавовлул бусаврийну, цIанасса ппурттуву цIакь бувну бур «Зунттал къучагъшиву» программалул гьануми документру, хIадур бувну бур гьурттучитурал давурттан кьимат бищайсса региондалул экспертътал, дузал дурну дур программалул официал символика, къуртал дуллай бур проектрал бренд даврил давуртту, хIадур дуллай бур аьркинсса полиграфиялул продукция.
ХIадур бувссар
ХI. Аьдиловлул
