ЦIуссалакрал райондалул администрациялий райондалул бакIчи МаматIи ХIамзатов хьунаавкьунни хасъсса аьралий операциялул гьурттучи, ЦIуссаккулатусса медсестра Роза МахIаммадоващал. Райондалул бакIчинал хIурматрай кьамул бунни хасъсса аьралий операция нанисса кIанттурдай пишалул бурж бартбигьлагьисса къучагъсса душ.
Розал бувсунни хьхьичI ххуттайсса тагьардания, хасъсса аьралий операциялий салкьи хьусса опытрая, гьарица кьини цала оьрмулун нигьачIаву дусса тагьарданий саллатIнал оьрмурду ххассал буллалисса даврил уртакьтурая. Райондалул бакIчинал ххал бивгьунни ванищал хасъсса аьралий операциялул гьурттучитуран ва миннал кулпатирттан кумаг баврил масъала, цIухху-бусу бунни миннал ичIаллил тагьардания, аьркин багьлагьисса кумаграя.
Роза МахIаммадовал тавакъю бунни райондалул бакIчинахь, бизан баврил программалул лагрулий, цинна къатри дансса аьрщи дулун кумаг бува куну. МаматIи ХIамзатовлул махъ буллунни ЦIуссалакрал агьлу цIусса миналийн бизан баврил масъаларттаха зузисса Дагъусттаннал ХIукуматрал управлениялущал му масъала ххал бигьин.
