Вай гьантрай «Илчилул» редакциялий хьунни Американаву ялапар хъанахъисса жула лаккуоьрчI, спортрал менеджер Ризван МахIаммадовлущалсса хьунабакьаву. ХIакьину ва хъанай ур UFC-лул кIира мухIулттул чемпион Ислам МахIачевлул, цIанихсса спортсмен ХIабиб НурмахIаммадовлул ва Аьрасатнал цаймигу хьхьичIунсса спортсментурал менеджер. Бигьасса иш бакъар дазул кьатIув махъ бусан, щала командалул ялувсса жаваблувшинна цала бакIрайн ларсун, спортсментал рязи бансса куццуй занакьулу хъанан. Хьунни ваналгу, жулгу дянив аьчухсса ихтилат.
Ризван, байбихьулий виятува, Американавунсса ххуллия бусарча ччива.
– Ттул нину-ппу Ккуллал райондалийсса Ккуллал шяравасса бур. Ппу, Рамазан, (аьпа баннав) туризмалул сфералуву зузисса инсан ия. Тай шиннардийва лагайссияв туристътуран Дагъусттаннал билаят ккаккан буван. 2000 шинал ппу аьпалул хьуна. Нину, Муъминатгу, бусса оьрмулий строительствалул фирмалий бухгалтерну дикIайссия. На увну ура МахIачкъалалив. Дуклай уссияв шагьрулул 42-мур школалий. 2004 шинал дуклан увхссара Дагъусттаннал паччахIлугърал университетрал чил билаятирттал мазурдил факультетрайн. Дуклай унува, ттун «Work and Travel» тIисса студентътурансса программалийхчIин Американавун гьансса сант диривуна. Хъунмасса тIайлабацIу хьуна ингилис мазрал даража гьаз баврицIун, цаймигу хайр-мюнпат бусса иширттаву итххяххаврингу. Байбихьулий, тихун увкIсса чIумал, хьхьу-кьини дакъа зий, хIарачат бан багьлай бия. ЛичIи-личIисса давурттай зий ивкIра. Ттула мурад бартбигьиншиврул захIматшивуртту духIан багьлай бия. На Американуву лахъи лавгун тIий вузравагу уккан увну ияв. Мунияту, ттула дуккаву къуртал даншиврул, махъунай учIан багьуна. Му чIумал Американаву ттул, нара тIиртIусса, хутIравун дагьсса логистикалул бизнес дуссия. 2013 шинайн бияннин Ухссавнил Американаву кьай-кьуй ххилаххисса, хъун дакъасса бизнес дуссия.
Вин, ингилис бакъасса, цамургу маз кIуллив?
– Ингилис, немец мазру университетраву дуклакисса ппурттуву ххуйну лавхьхьуссия. Американавун увкIсса чIумал ттуща бигьанма бюхълай бия ингилис мазрай гъалгъа тIун.
Немец маз тIурча, гъалгъалуву ишла къабуллай, чансса къуркъа хьуну бур.
Цукунсса бур жула вузирдаву ингилис маз лахьхьин баврил даража? КIулну бияв вин багьайсса куццуй ингилис маз?
– ЖучIара вузирдаву куртIсса кIулшиву дуллай бушиву исват хьуна ттун нава тихун учIайхту. Хъуннасса тапаватшиву дур ингилис мазрал ва американал мазрал дянив. Американалмур маз бувчIингу, ихтилат бангу бигьасса бур. Вузраву лахьлай бивкIсса 30-40 % тийх сайки ишлагума къавхьуна. Масалдаран, Великобританиянавун сайрданий лавгсса чIумал, мува ингилис маз бунугу, хъинну захIматну бия тайннащал гъалгъа тIун.
Цукун агьунна ина профессионал спортрал менеджершиврул индустриялувун?
– 2008 шинал на, дуккавугу къуртал дурну, цIунилгу зана ивкIссара Американавун. Му дия хIала-ккаласса данди буккавурттал спорт машгьур хъанахъисса чIун. Тийх ттул чIявусса гьалмахтал бия, ххуйсса инсантуращалсса дахIавуртту дия. UFC-лул организациялул, Американаву дакъассагу, дунияллул даражалийсса турнирду дуллай байбивхьуну бия. Та дия ММА-лул спорт машгьур хъанай нанисса чIун. Официал турнирду дуллан бивкIун махъ, чIявуми спортсменталгу ММА-лул спортравун кIункIу хъанай бия. ХьхьичIа-хьхьичI ва спортравун увкIуна ттул ххуйсса дус, Аьрасатнал ва Дунияллул боевой самболул чемпион Руслан Хабилов. Ванан Американаву хIала-ккаласса данди буккавурттал спортрал техника лахьхьин ччан бивкIуна. Спортрал менеджершиврул давугу на ваная дайдирхьуссия. Жула спортсментуран виза ласун, документру дузал бан, ялапар хьунсса кIантту лякъин кумаг буллан икIайссияв. Мукунма, шиккусса шартIирдащал кIул буллай, профессионал ххуллийх бачин кумаг буллай, идарарттащал, промоутерский компаниярттащал кьутIирду дуллай, спортсментуран хайр-мюнпат хьунсса куццуйсса гонорардал хIакъи-хIисавртту дуллай икIайссияв. Ххарину икIара ттула лагма ялтту яхI-къирият дусса, ххаллилсса оьрчIру буну тIий.
Ризван, ина Ислам МахIачевлущал та кIул хьура?
– Исламлущал на кIул увссара UFC-лул цIанихсса чемпион ХIабиб НурмахIаммадовлул. Байбихьулий на зий ивкIссара ХIабиблущал. 2013 шинал ва ия профессионал карьера дайдихьлахьисса, жагьилсса спортсмен. 2014 шинал турнирданийн увкIсса Ислам МахIачевлущал хьуссар ттул цалчинсса хьунаакьаву. ХIабибгу, Исламгу ларайсса тарбия, мяърипат дусса, хьхьичIун бурувгсса, машгьуршиврул ххаллил къабувсса, инсаншиву дусса оьрчIру бур. Мукунсса хасиятру дусса буну тIий вай тийхсса жагьилтурангу ххира хьуну бур. ХIабиб ур цала командалул лидер. Ванал цала каши-бюхъугу ишла дай жула спортсментал хIадур буллай, миннал чIарав ацIлай. Буниялагу ляличIисса хасиятрал заллу ур ХIабиб.
Цукун кьамул байссар спортсментал ХIабиб НурмахIаммадовлул командалувун?
– ХъунмурчIин ванал командалуву бур цIанихсса тренер Аьбдулманап НурмахIаммадовлул (аьпа баннав) школалийн занай бивкIсса спортсментал.
Аьбдулманап НурмахIаммадовлул кIицI лагайва ХIабиблул хъирив хъуннасса вихшала дишинсса спортсмен Ислам МахIачев ушиву. Уссарив ванал хъиривгу, ванал кIану бугьан кунасса спортсмен?
– ТIайламур бусан, цIана мукунсса ихтилатру буллан къабигьар. Цал-цал та яла гужну хIадур хьума спортсменнангу тIайлабацIу къавхьусса ишру шай. Ванал командалувусса спортсментурал дянив цIана хъинну хьхьичIунай нанисса ур Аьбдулманап НурмахIаммадовлул школалий вардиш хъанай ивкIсса Усман НурмахIаммадов.
Жула спортсментал чил билаятрал тренертурайн цукун бакIрайн багьайссар?
– Турнирданий гьуртту хьун нанисса спортсмен кIира-шанна нюжмардул хьхьичI учIан аьркинссар, бяст-ччаллайнсса махъра-махъсса хIадуршиннарду тиккура дулланшиврул. Мунияту вайннан тренировкартту дуллансса зал хIадур бан, лачIун буклансса гуж-кьуват бусса спортсментал ва ялапар хьунсса кIантту лякъин аьркинссар. Тийхсса машгьурсса тренертал ххуйну кIулсса, Американаву Боевой искусствардал школа тIивтIусса Мурад Кештовлул, ХIабиб НурмахIаммадовлул ва Ислам МахIачевлул спортрал даража чIалай, Американал ММА-лул ца яла цIанихма тренер Хавьер Мендеслущал кIул бувна. Махъсса ппурттуву жула командалуву чIяву хьунни профессиональныйсса спортсментал. Мунияту, лачIун буккаврил хIал ххал бигьинсса спортсменталгу цащалва бувцуну букIлай бур.
Цукун хIадур хъанай айишай Ислам МахIачев турнирданийн?
– Исламлул ва вайннал командалул турнирданийнсса хIадур шаврил цала техника дур. Цал гуж-кьуват цIакь буллалисса упражненияртту буллай, мунияр махъ Дагъусттаннайсса спортсментуращал данди уклай, лачIун уккаврил техника магьир дуллан икIай. Турнир дайдишин ца барз личIайхту, бяст-ччаллу бикIантIисса билаятрайн увкIун, ацIаву дакъа хIадур хъанан икIай.
Цукунсса дур чил билаятирттайсса инсантурал жула спортсментурал чулухуннайсса бургаву?
– Зунмагу хIисав хьухьунссар, Нью-Йорклив най диркIсса махъра-махъсса турнирданий яла сий дума спортсменгу жула Ислам ушиву. Ва октагондалийн уккайхту, 70% тамашачитурал ванахлу буклакисса бия. МахIачевлул ккаккан бунни цува UFC-лул рейтинграл цалчинмур ххуттайсса чемпион ушиву. Ислам спортравусса ккаккиярттайну акъассагу, яхI-къирият дусса, хьхьичIун къаличлачисса уну тIий, ялу-ялун чIяву хъанай бур ванал фанатътал. Цащалва лачIун бувксса спортсментурал чулухунмайгу ванал хъунмасса хIурмат-кьимат бур. Укунсса хасиятру дусса буну тIий ххирасса бур Исламгу, ХIабибгу болельщиктуран.
Бюхъайссарив укунсса даражалул турнир Дагъусттаннайгу дан?
– Дагъусттаннай хъунисса даражалул турнирду дулланшиврул, мунин лархьхьусса инфраструктурагу дикIан багьлай бур. ХIакьину жучIава бакъар чIявусса инсантал лагайсса хъунисса стадионну, конференц -заллу, гостиницартту. Спортсментал, вайннал командартту, болельщиктал бакъассагу, турнирду сакин давривух хIала бувххун буссар хъинну чIявусса инсантал. ХIакьину жучIара мукунсса чемпионатру дуллансса инфраструктура дакъар.
Ризван, инавагу гьуртту шарав профессионал спортсментурал тренировкарттай?
– Ттул щала оьрму спортрацIун бавхIусса бур. Школалий дуклакисса чIумал дзюдорахун агьну икIайссияв. Махъва-махъ на гьуртту хьуссара 2013 шинал Американаву хьусса Джиу- джитсулул турнирданий. На навагу ММА-лул фанатра. ОьрчIнийва уруглан икIайссияв Федор Емельяненкол бяст-ччаллах. Хъирив ивзун икIайссияв хIала-ккаласса данди буккавурттал спортраву хъанахъимуних. Турнирданийн хIадур хъанахъийни Исламлул ва цаймигу жула спортсментурал цала бюхъу-хIал ххал буллалисса приемру ттущалгу дайссар.
Цуксса чIявуну ияра вила буттал шяравун, Ккулув?
– ХIарачат бара шинай кIийла Дагъусттаннайн учIан, увкIтаривгу чара бакъа Ккулувн ияйссара. Лаккуй дуссар ттул къатри. Цукуннив гъира багьну, ризкьи ябуллансса фермалул строительствагу дайдирхьуну ура. ДакI ххари хъанай дур буттал шяраву инсантал цIу-цIусса къатри дуллай, духми цIу дуккан дуллай бушиврия.
Блогер Хасбик, Ислам ххув шайхту, ятIул сумкалущал октагондалийн увкуна цукун агьссар ва Исламлул ва ХIабиблул командалувун?
– Хасбик Исламлуя арх акъа Хушетрай ялапар хъанай уссар. Ваналгу дуссар UFC-лущалсса контракт. 2020 шинал, ХIабиблул бой бусса чIумал, ванащал увкIссия Хасбикгу. ЦIана ва тийх хъинну машгьурну ур. Дэйна Уайтлунгу ва ххирар. 2022 шинал Абу-Дабилив Исламлул бой бусса чIумал, Дэйнал ванан цалчинмур кьюкьлуву кIану бувна. Дэйнал мудан цIуххайссар турнирданийн Хасбула учIантIиссарив куну.
Республикалул бакIчи Сергей Меликовлущалсса хьунабакьаврия цукунсса асарду хIасул хьуна?
– Сергей Аьлимовичлущалсса хьунабакьаву жул цалчинсса дакъая. ЧIявусса къайгъурду бунугу, ванал мудангу чIун лякъай спортсментураха аякьа дансса. Ва ххуллухьсса хьунабакьавугу хIурмат-кьиматрайсса ва дакIний личIансса хьунни.
Цукунсса дур Ислам МахIачевлул гихуннайсса планну?
– Цалсса Ислам цахъис хIаллай игьалагансса пикрирдай ур.
Ихтилат къуртал буллай, ци учивияв жула жагьилтурахь?
– Ттун ччива жула жагьилтурая цала гужгу, гьавасгу мюнпатну ишла буллалисса, тIайла бавцIусса, жаваблувсса, эбратрансса, жула республикалул цIа лайкьну дуручлансса инсантал хьуну.
– Барчаллагь, Ризван, дакI тIиртIусса ихтилатрахлу. Жагьилтурал дянив лакку маз сийлий бакъасса ппурттуву, Исламгу, инагу марцIсса лакку мазрай гъалгъа тIий бушиврия, ччя-ччяни буттал шяравун бучIаврия хъунмасса пахру бикIай. Умуд бур вания тихунмайгу, мазгу, миллатгу ххирасса уздансса хасиятругу дурурччуну, жула жагьилтал миллатрая арх къабуцанссар тIисса.
Имара Саидова
