Дякъил ццихь бусса бигьалагай кьини ттун гьансса бувккунни Украиннал аьрщарайсса данди бацIавриву жан дуллусса арснал ца уттигу ниттичIан.
![](https://ilchi.info/wp-content/uploads/2022/03/channanov3.jpg)
Ккуллал шяраватусса Маликлул арс Чаннанов МахIмудлун, Донецкаллал ва Луганскаллал цIанийсса талатавриву чувшиву дурсса хIакьсса саллатIнан, Аьрасатнал ХIукуматрал чулухасса Чувшиврул орден дуллунни. Ттун ва оьрчIал сурат ккарккуна Ккуллал райондалул администрациялул Инстаграмрайсса аккаунтрай. Хъинну кьувтIуна оьрмулул 21 шинавусса жагьилнал бивкIу. На комментарий чивчуссия: «Авуршиву, ххуйшиву ва жагьилнал, фамилиягу аслийсса лакку фамилия дур, ваниву чаннал паргу, чаннаннил зяйгу бур», – куну. Яла махъ кIул хьуна ва Шамсият Оьмаровал ца акъа-акъасса арс ушиву. Аьрасатнал Виричув НурмахIаммад ХIажимахIаммадовлул нину Сапижат Мазаева кунма, Шамсиятгу Сепараторный посёлокрай яхъанахъисса лявкъунни, сайки ца кучалий – Сапижат ххуллул ялув, Шамсият – ххуллул лув. Цалавхьхьусса ишру вайннул кьадардануву цаймигу лявкъунни.
Лавхъра лифт дакъасса арулчинмур зивулийсса Шамсиятлул ужагърайн. Лаякъатрай яхъанахъисса лявкъунни. ХьхьичIва кIулну бухьурчагу, къатлул, кулпатрал хIалкьазия цIухлан къабикIарухха. Къатлул хозяйкал ва зуруйсса багьа къаласунна кунни тIий бур Шамсиятлул ссу. Цуппа Шамсиятмур, къювулул лахIан бувну бухьурчагу, ялун увкIнаха хIурматрай, зукьлу-дуаьрдай бур.
Шамсият Оьмарова:
– МахIмуд увссар Буйнакскалий, ттул лас аьралий инсан ия, мунал часть Буйнакскалий дия. МахIмудлун шин ва кIива барз шайхту, личIи хьун багьуна. Арснащал зана хьуссияв Ккулув нитти-буттачIан. Фермалий зий бивкIра цIубутIуй, яла, нитти-буттачIа асргу кьаивтун, маэшатралшиврий Москавливгу зий бивкIра. Арулла шин хьунни Тархо ттучандалий зий. МахIмудгу ттула буттащал шяравусса давуртту дуллан, баван кумаг буллан икIайва. ЛичIину дуккаврих шавкь дусса акъая, захIмат ххирая, спорт ххирая. Нагу хIарачат буллан бикIайссияв, ттула арс щиярчIав лувну къаитанна тIий, ххуймур лаххан уван, нахIумур дукан уван. Ламус буллан икIайва. На зунтIиссара, къаттагу ласунтIиссар, инагу шаппа щябикIантIиссара тIун икIайва. Ттуйгу аьтIий ия. АхIвал ххуй буван, контракт цIакь дуруна. Давуртту дакъархха, ссаха зува тIий ия. Ва армиялийн нанисса кьини буслай бусан къашайсса къумашиву дия дакIниву, илгьан бухьунссия. Гьантри ккалай буссияв. Мукьва барз ливчIун буссия шавай учIан. Дяъвилул аваза байбивхьуна. «Бавай, жу Донбассрайн тIайла буккан най буру», – увкунни. Ттунма ва Аллагьнан кIулсса куццуй бивкIра, чаклий бавцIуну, дуаьрттура-дуаьртту дуллай. Ттулама арснацIун циняв зана хьуния тIий бивкIра. Февраль зурул 22-нний, хьхьувай, ссят урчIуннил дачIи хьусса чIумал, связьрайн увксса ккавккуна. Танияр махъ Ватсапрайсса связьрай акъая. Февраль зурул 28-нний, бацIан къахъанай, оьвчав командир Андрей Ковалевлуйн. «Ххуйну буру, телефонну дакъассар саллатIтурахь , пикри мабара», – куна. Яла, ца кьини, мачча-гъаннал щаллусса кьюкьа кIюрххилла дучIайхту, бувчIуна арснан ци-бунугу хьушиву. Госпитальданий щаву дирну ур тIий бия. Яла информация бахханану баллан бивкIунни, сагъну усса ур, акъасса ур тIисса. Ахиргу мяйжан хьуна къахьунмур хьуну бушиву…
ТачIав арснал зумату асар хьунсса махъ бавну бакъара. ТIайла авцIусса , хьхьичIун урувгсса арс хьунни тIий, ххарину бикIайссияв. Душваврал суратру ккаккан дуллай ия, тиха учIайхту, щаллу уванна тIий буссияв, ляхъингу бавтIун. Ляхъингу, махлукьатгу батIин бувунни.
Гулизар Мутаева, Ккуллал 2-мур школалул оьрус мазрал ва литературалул учительница:
– МахIмуд ттул ученик-я. ХIарачат бусса, хъинну личIлулсса оьрчI ия, спортраву итххявхсса ия. Хъинну дакI тIиртIусса, инсаннан кумаг буван хIадурсса ия. На ахъуву зий ккаккайхту, чIатIа зехлан икIайва. ЧIунархIалминнал дянивгу, цаярва хъуниминнал дянивгу бусравсса ия. Лиза ва Ризван ялугьлай буссия, душнил арс мукьва зурува учIантIиссар тIий. Кьуния цара шинавусса оьрчIал чувшиврий жан дуллунни, цайвасса аьраличувнал бурж биттур бувну.
Ва жул цинявннал дакIурдиву лич1ант1иссар.
Саида Мирзаева, МахIачкъалаллал 26-мур школалул педагог:
– Жу школалий уттигъанну Аьрасатнал Виричув НурмахIаммадлун ва Чувшиврул орден ларсъсса МахIмудлун хас дурсса Чувшиврул дарс дирхьуссия. МахIмудлул нину Шамсият ттул ученицая. На, Педагогикалул институт къуртал бувайхту, буттал шяраву Ккулув зий буссияв. Шамсият паракьатсса, тIул-тIабиаьт ххуйсса, низам цIакьсса душ бикIайва. Вайннал щалва кулпатгу шяраваллил агьулданун ххирасса, цинявннанмагу бусравсса, гьарцаннащал хIал бавкьусса, захIмат ххирасса агьлур. Авурсса, зирангсса жагьилнал цува къучагъсса талатала ушивугу илданун ккаккан бунни. Дуклаки оьрчIахь ванал оьрмулия бусласийни, кIия оьрчI хъювусулгума увккуна. МахIмуд Чаннанов, чаннан куна, цIакьсса ва чаннасса жагьил ия. Жунагу, ялун бучIантIиминнангу хъамакъаитантIиссар.
![](https://ilchi.info/wp-content/uploads/2022/03/channanov4.jpg)
Суратру Оьмарова Шамсиятлул архиврава