Аьрасатнал студентътурал байрандалул хьхьичI кьини Дагъусттаннал ХIукуматрал хъунама Аьбдулмуслим Аьбдулмуслимов ивунни ДГТУ-лувун. Ванал ххал дунни республикалул вузирдал техникалул хьхьичIуншивурттал выставка, барча бунни студентътал. Ванащал бия вице-премьер Муслим Телякавов, жагьилтурал министр Камил Сяидов, Халкьуннал Мажлисрал комитетрал хъунмур Елена Павлюченко. ДГТУ-рал ва ДГПУ-рал студентътурал хъамаллуран ккаккан дунни цалла карунних дартIсса агророботру ва дронну.
Студентътурал бувсунни робототехникалул кумаграцIух шяраваллил хозяйствалул давуртту хьхьичIуннай хьунтIисса чаранная. ДукIу ва вузраву тIивтIуссар «Технолет» тIисса, БПЛА-лул оператортал ва техниктал хIадур буллалисса центр. Педагогикалул университетрал студентътурал вузрал технопаркрал гьанулий дартIсса БПЛА ккаккан дунни. Ва вузравугу робототехникалул курсру буссар. Дагъусттаннал бакIчи Сергей Меликовлул ва министртурал цIания студентътал барча буллай, премьернал кIицI лавгунни, Дагъусттаннай ларайсса кIулшиву ласлай бушиву 140 азарунниха ливчусса студентътал, гьар шинах 29 азара выпускник икIайшиву.
ДГТУ-рал ректор Назим Баламирзоевлул кIицI лавгунни, Аьрасатнал студентътурал байран-кьини цIакь дурну гьашину 20 шин хъанай душиву, Дагъусттаннал хъуниминнал студентътурал масъаларттах мудангу хъуннасса къулагъас душиву.
Премьернал барча бунни дунияллул халкьуннал ва Аьрасатнал лагрулийсса конкурсирттай хьхьичIун ливчусса, грантру ларсъсса студентътал, жагьилсса аьлимтал ва волонтертал.
ПатIимат Рамазанова
