ПпабакIул бакIрай
Ларгсса алхIаткьини Буршай хьунни «ПпабакIу – 2026» цIанилусса спортрал туризмалул фестиваль лакьлакьисса шадлугъ.
Кказитрал хьхьичIмур номерданий чивчуссия фестиваль дайдирхьушиврия. ДакIнин бутан, Лаккуй цалчин дуллалисса спортрал туризмалул фестиваль дайдирхьуссар августрал 17-нний, дайлиртIуссар августрал 23-нний. Ваний гьуртту хьун Аьрасатнал регионная Буршиял даралувун бувкIссар 200-ннийн бивсса туристътал-альпинистътал. Фестивальданул программалийн бувну, вай лавхъссар зунттурдайн, хьхьичIва-хьхьичIрив – ПпабакIу-Зунттуйн.
Фестивальданул сакиншинначитал: Дагъусттан Республикалул Спортрал федерация, Туризмалул ва халкьуннал сянатирттал, Физическая культуралул ва спортрал министерствартту, Лакрал райондалул администрация.
Фестиваль лакьлакьисса шадлугърай гьуртту хьунни Лакрал райондалул администрациялул бакIчинал хъиривчув Малик ХIусманов ва райондалул администрациялул Туризмалул ва спортрал отделданул хъунаманал хъиривчув Аьбдулла Юнусов.
Райондалул бакIчи Зураб Куччаевлул цIания ва фестивальданул сакиншинначитурахь ва гьурттучитурахь барчаллагьгу куну, Малик ХIусмановлул кIицI ларгунни сакиншиндарал группалул лавайсса даражалий биттур дурсса даву. Фестивальданул гьантрай ванил гьурттучитуран мюхчаншиву щаллу даврихлусса Барчаллагьрал чагъарду буллунни Аьрасатнал МЧС-рал поисково-спасательный подразделениялул начальник Мурад Гойчуевлун ва Аьрасатнал МЧС-рал цалчинмур классрал ххассалбуву Сердер Эмирчубановлун.
Фестиваль нанисса гьантрай ПпабакIу-Зунттуйн лавхъссар сайки 100 инсан. Гьурттучитурал палаткарттал лагерь бивкIссар Буршиял хьхьичIсса даралуву, Хъуннеххал зуманив. Сакиншинначитуран ва лагерь бувангу, фестивальданийнсса цайми давуртту дувангу кумаг буллай къачансса волонтертал бивкIссар. Вайннавух Ккуллал райондалийсса Цалчинмур ЦIувкIратусса Асланбек Салимовгу. Ва ур Каспийскалийсса Машиностроениялул ва сервисрал колледжрал студент. Селим ттинингу хьуну ур ва журалул фестиваллай. Рязину ур тти Лаккуй хъанахъимунийгу гьуртту шаврия, ПпабакIуйн лахъаврия.
ПпабакIуйн лавхъсса жагьилтуравух мукунма бур цуппа лазгиридуш бунугу, лакку мазгу, жулва миллатрацIун дархIусса цимурцагу ххира хьусса Диана Бабаева:
– Зунттурду ттун хъинну ххирар. Мукунна ххирар цIусса цимурца, къаххирар ца кIанай бацIаву. Мунияту фестивальданий гьуртту хьунсса хIалугу лях гьан къадитав. Ттунма ххира хьусса лакрал миллатраясса цIу-цIусса инсантуращалгу кIул хьура, бюхттулния тамаша бував лакку зунттурдай, лакку тIабиаьтрай, – тIий, рязину бур Диана.