Декабрь зурул 15-нний, щалагу билаятрай кунма, Дагъусттаннайгу дакIнин бичайссар пишалул бурж бартбигьлай жанну дуллусса журналистътал.

«Пашмансса кьини дур ва. Вай цинявппагу цIа дурксса, гьунар бусса журналистътал, лавайсса даражалул пишакартал бия. Вай дунияллия лагаву щалагу республикалун ва жунма гьарцаманан дакIнин щунсса кьурчIисса ишну хьунни. Ттун бахтти хьуна чIявуминнащал зун ва дусшиву дан. Гьарцама ия ляличIисса, яргсса, вайннацIа чIявусса затру лахьхьинссия», – увкунни, журналистътал дакIнин бичлай, Дагинформрал каялувчи Арсен Юсуповлул.
Дагъусттаннай, 90-ку шиннардил ахирдания байбивхьуну, 10 шинал лажиндарай чIявусса журналистътуран бала-апатIру хьуссар. Му чIумул мутталий 19 журналист оьрмулуцIа хьуну ур. Ми иширттал хIакъиравусса чIяруми делорду уттигу ашкара дурну дакъар.

МахIаммад Сулайманов, Валерий Ефимов, МахIаммад-СалихI Гусаев, Загир Арухов, МахIаммад-Загьид Варисов, Илияс Щурпаев, ХIажи Абашилов, Рашид Гъазилалиев, Тельман (Аьбдулла) Аьлишаев, Аьбдулмалик АхIмадилов, Шамил Аьлиев, Саэд (МахIаммадсаэд) Ибрагьимов, МахIаммадвакил СултанмахIаммадов, МахIа­ммадсаэд Темеев, ЯхIия Ма­хIаммадов, Гьарун Кьурбанов, ХIажимурад Камалов, Рамазан Новрузаьлиев, АхIмаднаби АхIмаднабиев мудангу дакIний бикIантIиссар дустуран, даврил уртакьтуран, гъан-маччанан. Вай бия тIайламунихлу талатисса хIакьсса патриотътал.
Аьрасатнал Журналистътурал союзрал бусласимунийн бувну, жула билаятрай 1993-2013-ку шиннардий оьрмулуцIа увсса 341 журналистнава яла чIявуми Дагъусттаннал СМИ-лул зузалт бур.

Андриана Аьбдуллаева