СумбатIуллал шяравасса Оьмаров Мирзал ва муная бивзсса наслулул ужагърайн лайкьри патриотътурал кюру учин. Вайнная бувккун бур арула адамина Ватан дуруччултрал бурж лайкьну лавхъсса цила чIумал Совет Союзрай, яла Аьрасатнаву.
Оьмаров Мирза цува XX ттуршукулул 50-ку шиннардий шанна шинай совет аьралуннаву къуллугъ буллай уссия, мунал хъабакIсса мюрщими уссурваврал, МахIаммадал ва Мусалгу, лавхъссар аьралуннаву цала буржру. Мирзал хъунама арс Оьмар ва чIивима арс Арсен шан-шанна шинай къуллугъ буллай бивкIссар аьралуннаву.
Оьмардул ва Наташал бур шама арс. Хъунама Назим Аьрасатнал аьралуннаву контрактрай къуллугъ буллай уссия. Хасъсса аьралий операция байбивхьуния шинай Донбассрай уссар. Тийх ккаккан дурсса чувшиврухлу лайкь хьуну ур Суворовлул медальданун. Москавлив учIан увну, Аьрасатнал президент Владимир Путиннул цалла ларчIунни ванал хъазамрай медаль. Мунияр махъгу ванан дуллунни медаль «За отвагу». Назимлул чIивима уссил, Нуруллагьлул, 2003-ку шинал къуртал бувна школа. Яла нину-ппу зузисса «Ачи-Су» тIисса муххал ххуллул станциялий зий уссия. Зий унува къуртал бувна Ростоврай Муххал ххуллул университет. Муния махъ ца арснащал зий уссия «Новый Хушет» тIисса муххал ххуллул станциялий мастерну. Броньгу дунува, цала хушрай уссил хъирив хасъсса аьралий операциялийн лавгунни. Херсоннал областьрай гьужум бай кьюкьлуву талай, Ватандалухлу жан дуллунни.
Аьпалул хьуну махъ ванан дуллунни Чувшиврул орден. ЧIивима арс Нукзаргу мува муххал ххуллий зий ур. Наташа бур Нуруллагьлул кулпатрачIа ятиннаха аякьалий. Наташал ппу Аьлилгу Буттал кIанттул цIанийсса Хъунмасса дяъвилул гьурттучия. Аьпалухьхьун лавгсса уссил АьбдурахIманнулгу лавхъссия Аьрасатнал аьралуннаву кIира шинайсса бурж.
Язугъ бур ниттий, Наташай, оьрмулуву лухIи ликкан кьисмат къахъанахъисса. Амма Наташа яхI гъагъайминнаясса бакъар. Цайми, цуппа кунмасса, ниттихъал дакIругума дуллалисса бур. Циламур оьрмугу буттал къатлуву ятиннур лавгсса. Укун кьянкьасса ниттихъалгу, миннал арсурвавралгур ва хIукумат ядуллалисса.
Нуруллагьлун ва ниттин Наташан хас бувну вай ца-кIива ххагу чичав:
ХIурулъэнтураву яхI ба,
Нуруллагь,
Алжаннаву дачIлай миннащал
дакIгу.
ЯхI банссар ниттилгу вичIан
дучIаннин,
Вил лавгсса оьрмулул хIисав-сан
дуллай.
Къучагътурал бавай, яхI ба,
Наташай,
ЧIявусса ниттихъул мукунни
бусса.
МахIмуд Аьлилов,
ш. СунбатIул
