ЦIуссалакрал райондалийсса Чапаевкаллал 2-мур школалий тIивтIунни ттизаманнул оборудованиялул дузал бувсса цIусса агрокласс.

Ва тIитIлатIисса мажлисрай гьуртту хьунни ДР-лул шяраваллил хозяйствалул министрнал буржру биттур буллалисса Зураб Куччаев, райондалул муниципалитетрал вакилтал, учительтал ва дуклаки оьрчIру.

Республикалул школардай агроклассру тIитIлай байбивхьуссар «Кадры в АПК» тIисса федерал проектрайн бувну. Агроклассраву дуклакисса оьрчIан кIулшиву дулун кумаг буллантIиссар Дагъусттаннал Аграрный университетрал, Буйнакск шагьрулул Шяраваллил хозяйствалул ва Дагъусттаннал Огниливсса Аграр колледжрал преподавательтурал. Дуклаки оьрчIру хIала-гьурттуну бикIантIиссар яла хьхьичIунми шяраваллил хозяйстварттал идарарттащал. Шикку оьрчIру кIул бантIиссар ризкьичитурал, багъманчитурал, ветеринартурал ва мукунма цаймигу пишардащал.

ДакIнин бутан, 2025 шинал Дагъусттаннал премьер-министр Аьбдулмуслим Аьбдулмуслимовлул АьФ-лул шяраваллил хозяйствалул министр Оксана Лутлущалсса хьунабакьаврий кадрардал дузалшиннарал масъала гьаз бувну бивкIссар.

Муний премьер-министрнал кIицI лавгссар Дагъусттаннал шяраваллил хозяйствалул отраслилуву 3000-хъул пишакар тIалавну ушиву. Аьбдулмуслим Аьбдулмуслимовлул бусаврийн бувну, 2030 шинайн бияннин, шяраваллал школардай 475 агрокласс тIитIин тIий бур, миннува 28 – 2025 шинал.
ХIакьинусса кьини Дагъусттаннай тIивтIуну бур 50-хъул агрокласс.

Имара Саидова