Уттигъанну Балугъравун къабивминнал иширтталсса байсса комиссиялул пишакартал ва ЦIуссалакрал райондалул администрациялул зузалт бивунни Чапаевкаллал 1-мур, ЦIуссаккуллал 1-мур ва Гьамиящиял 1-мур школардайн.

Шиккун бувкIун бия Комиссиялул хьхьичIунсса пишакар Лиана МаматIиева, ЦIуссалакрал ОМВД-лул дознаниялул группалул хъунама АхIмадхан МахIаммадов, ОМВД-лул балугъравун къабивминнал иширттал подразделениялул инспектор Рамазан Пахруттинов, «Цалчинминнал суккушиннарал» кIанттул отделениялул председатель Жамила Мусиева, райондалул школардал директортурал советниктурал координатор ПатIимат Аьбдулмуслимова.

Школардайнсса аьрххилул мурад бия дуклаки оьрчIал нитти-буттащал хьунабавкьуну, оьрчIал тарбиялул хIакъираву ихтилат баву. Хъамаллурал бувчIин бунни нитти-буттан балугъравун къабивми санкция къадуллусса митингирттай ягу чIявусса инсантал хIала бувхсса акциярдаву гьуртту шаврихлу жавабрайн буцайшиву, мукунма жавабрайн буцайшиву экстремизмалул ва терроризмалул пикрирду ппив буллалаврихлу, наркотикру ишла баврихлу ва теракт хьунтIиссар тIисса тIайлабакъасса информациялухлу.
Ихтилат хьунни балугъравун къабивминнал цанма цала бувсса, мукунма хъуниминнал оьрчIай зулму бувсса ишру хьун къабитаврия.
Ахирданий Лиана МаматIиевал бувсунни нитти-буттахь оьрчIру ссят 22.00 хьуну махъ хъунасса инсан архIал акъана жяматийсса кIанттурдай бикIан къабучIишиву, дакIнин бувтунни закон къакIулшиврул жавабрая мурахас къаайшиву.

Андриана Аьбдуллаева