Вай гьантрай «Дагестан» РИА-лул редакциялий хьунни пресс-конференция «Движение Первых» тIисса суккушиннарал региондалийсса отделениялул советрал председатель, ДР-лул бакIчинал кумагчи Людмила Саидовал. Шикку бувсунни чIал къавхьуну «Фестиваль детских общественных организаций» ва «Выпускники Первых» тIисса проектру байбишинтIишиву.

Май зурул 20-21-нний Дагъусттаннай хьунтIиссар «Фестиваль детских общественных организаций», «Выпускники Первых» тIисса цIардалусса хъуннасса агьамшиву дусса мероприятияртту. Вай даврил мурад хъанахъиссар ялун нани­сса ник патриот зумуну тарбия даву, региондалул жагьилтал жяматийсса давурттавух гьуртту хьун баву, куннал куннащалсса даврил опыт кIибачIаву, творчествалул иширттавух хIала буххан баву.
Фестивальданий гьуртту хьунтIиссар ветерантал бакIчисса хIурмат лавай­сса хъамал ва Дагъусттаннал хIукуматрал властьрал органнал вакилтал.
Людмила Саидовал бусаврийн бувну, «Движение Первых» тIисса суккушинна хIасул дурну хъунма хIал къавхьунугу, Дагъусттаннайсса отделениялий гьурттучитурал ва насихIатчитурал сияхI 1555 инсаннайн дирну дур. ОьрчIан хас дурсса фестивальданул дур 12 направление. Шикку бикIантIиссар цинярдагу направлениярттан хас бувсса майданну. Гьурттучитураща бюхъантIиссар «Первый в профессии», «Наука и техника», «В гостях у ученого», «Мы граждане России», «Поход с Первыми» тIисса ва цаймигу проектирдащал кIул хьун.
Мероприятиярттай чялишсса гьурттушинна дурсса оьрчIан дулунтIиссар «Движение Первых» тIисса суккушиннарал лишанну дусса бахшишру.
Май зуруй хьунтIисса мероприятиярттай гьуртту хьун аьрзри буллуну бур 2000 инсаннал.

Имара Саидова