Январьданул 16-нний оьрмулул 70 шин бартларгунни ЧIяйннал шяравасса ххаллилсса педагог, Дагъусттаннал лайкь хьусса учитель Шагьабуттинова Гулжагьра Сулайманнул душнин.
ЧIяйннал школалий байбихьулул классирттал учительницану зий гьашину щаллу-ккурккисса 50 шин хъанай дур.
Бувну бур Гулжагьра 1955-ку шинал Хъювхъиял шяраву. Тай шиннардий ванил нину-ппу, Буттал кIанттул цIанийсса Хъунмасса дяъвилул участник Сулайман ва ПатIимат Хъювхъиял школалий зий бивкIун бур. Вайннал ряхва оьрч1ава ххюва Хъювхъиял шяраву бувну бур.
1973-ку шинал ЧIяйннал дянивмур даражалул школа къуртал бувну махъ, Гулжагьра бувххун бур дуклан Буйнакскалийсса Хъаннил педучилищалувун.
1975-ку шинал мугу лавайсса кьиматирттай къуртал бувну, зун байбивхьуну бур Ккуллал мяйра шинайсса школалий байбихьулул классирттал учительну.
Шикку зий хъунмасса хIал къабарчагу (1975-1976ш.ш.), хIакьинусса кьинигу, та чIумал Гулжагьрал дарс дирхьусса оьрчIан ва ххуйну дакIний бур.
Ца шин Ккуллал школалийгу дурну, бувкIун бур зун ЧIяйннал дянивмур даражалул школалийн. Жула учайссар, чIирал гьану цIакьсса барча, чIирагу цIакьну бацIайссар куну. 50 шинал лажиндарай Гулжагьрал цимигу никирал оьрчIан цIакьсса кIулшивурттал гьану бивзун бур. Зий бунува къуртал бувну бур Дагъусттаннал Педагогикалул институтрал географиялул факультет. ХIакьинусса кьини щалагу Аьрасатнаву, личIи-личIисса шагьрурдай лавайсса къуллугъирттай зий бур ванил учениктал. ЦIанасса ЧIяйннал школалул директор Альбина Гаммакуевагу ванил ученица бур.
ОьрчIру тарбия баврил ва миннан кIулшивуртту дулаврил ххуллий бивхьусса захIматрахлу Гулжагьра лайкь хьуну бур Дагъусттаннал КIулшивуртту дулаврил министерствалул ХIурматрал грамоталун. Ванин цимилагу дуллуну дур райондалул администрациялул ва КIулшивуртту дулаврил управлениялул чулухасса грамотартту.
ЧIяйннал школалул 100 шинал юбилейрацIун бавхIуну, чIярусса шиннардий оьрчIру тарбия бавриву бихьлахьисса захIматрахлу дуллуну дур «Дагъусттаннал лайкь хьусса учитель» тIисса бусравсса цIа. 2012-ку шинал райондалийсса «Шинал учитель» конкурсрай шамилчинсса кIану бувгьуну бур. ХIакьинусса кьинигу буххаву дакъа зий бур. Гулжагьрал хIурмат хъунмасса бур дуклаки оьрчIачIа ва шяраваллил жяматрачIа. Цивппа оьрчIругу, миннал нину-ппугу хIакьинусса кьинигу ванийн барчаллагьрай бикIай. ЛичIи-личIисса шагьрурдая оьвтIун бикIай, шяравун бувкIукун ваничIан къабувххун къалагай.
Гулжагьра бур оьрчIал дакIурдивун ххуллу ласун кIулсса учитель, лавайсса даражалул пишакар. Цила давриву ванил хъуннасса къулагъас дай дуклаки оьрчIру Ватан ххирану тарбия баврих. Цила ласнащал, МахIаллищал, ххаллилсса тарбиягу дуллуну, дуккингу бувну, цала-цала оьрмулул ххуллийн бивчунни кIия арс ва кIива душ.
Пишалул ххуллий бакъассагу, гьарица ишираву бюхъу-хъит бусса, дан-дитан кIулсса хъамитайпа бур Гулжагьра.
Шяравусса гьарица хъатIуйн жалиндалул бакъухъ бан ванийн оьвчайссар.
Ва барачатсса бур тIий, ташулул иширттавух хIала бакьлан бикIай. ЧIивину бунува буттал къатлуву захIмат буллай аьдат хьусса душру бур Гулжагьрагу, ванил ссу ПатIимат ва уттигъанну аьпалухьхьун лавгсса Мисидугу. Мюрщими уссурвавралссагу бувну, циняр ичIаллил давурттугу вайннал дайсса диркIун дур.
ЦIанагу гьарица даврил сант кIулсса, усттарсса Гулжагьра шяраваллил жяматрал ххаришивурттайгу, бивкIу-буккурдайгу чIарав бацIай. Цаманал буруккин лаласун кIулсса, дакI аьчухсса, хъиншиву-хъинбала бан чялишсса Гулжагьра шяраваллил жяматран бусравну бур.
Юбилейгу барча дуллай, чIа тIий бур буру Гулжагьран цIуллушиву, бигьа бакъасса пишалул ххуллий так хьхьичIуннайшивуртту ва тIайлабацIурду, зунсса гъира ва гьавас.
Андриана Аьбдуллаева
