Дагъусттаннал шяраваллил хозяйствалул министр Шамил Рамазанов хьунаавкьунни «Школьный агростартап» тIисса щалагу Аьрасатнал конкурсрай ххув хьусса дуклаки оьрчIащал.

«Школьный агростартап» тIисса федерал конкурсрай цалчинсса кIану бувгьунни Къумтуркъалаллал райондалийсса Тюбе поселокрайсса школалул 9-мур классрал дуклаки оьрчIал – Марат Хасаевлул ва Ларианна ЯхIияевал. Министрнал барчаллагь увкунни дуклаки оьрчIащал зий бивкIсса школалул завуч Анисат ХIусмановахь ва педагог Эльмира Айдековахь.

Конкурсрал жюрилул личIи-личIисса гьаннарду ххяххан бавриву хьхьичIуннайшивуртту хьун дурсса дуклаки оьрчIал захIматран лавайсса кьимат бивщунни. ХIакьинусса кьини оьрчIру ххяххан дуллай бур хъюрув ва кьая. Гихунмай пикрилий бур пархтIутIул, горчицалул ва цаймигу гьаннарал ххяххияртту дугьлан.
Гьашину ва конкурсрайн буллуну бур Аьрасатнал 64 региондалиясса 326 аьрза. Дагъусттаннаясса командалул лавайсса даражалий дурну дур цала проектрал презентация.
Шикку ххув хьуну, цалчинсса кIану бугьаву бакъассагу, командалун бахшиш хIисаврай дуллуну дур агроклассран аьркин бансса теплица бусса набор, багъраву ишла буллансса ярагъ ва зузийни лаххайсса конкурсрал лишанну дусса яннарду.
ДакIнин бутан, республикалул школардай агроклассру тIитIлай байбивхьуссар «Технологическое обеспечение продовольственной безопасности» тIисса миллатрал проектрал лагрулийсса «Кадры в АПК» тIисса федерал проектрайн бувну. Шикку оьрчIру кIул буллалиссар ризкьичитурал, багъманчитурал, ветеринартурал ва производствалуха зузиминнал пишардащал. 2030 шинайн бияннин шяраваллил кIанттурдайсса школардай тIитIин тIий бур 475 агрокласс.
Миннува гьашинусса шинал ахирданийнин тIитIин най бур 28 агрокласс. ХIакьинусса кьини Дагъусттаннай тIивтIуну бур 50-хъул агроклассру.