ЦIусса дуккаврил шин шадлугърал тагьарданий дайдирхьунни МахIачкъалаллал 34-мур школалийгу. Школалул директор ХIажи МахIаммадовлул ,бавтIцири барча буллай, кIицI лавгунни бусравсса хъамаллуравух шадлугърал линейкалий бушиву Аьрасатнал ва Дагъусттаннал лайкь хьусса учитель Галина Къараева ва виртталсса арсру тарбия бувсса Саният ХIажиева.
Галина Къараева ххюцIалунниха лирчусса шиннардий ва школалий оьрчIан куртIсса кIулшивурттугу, цIакьсса тарбиягу дуллай оьрму гьан бувсса инсанни. Ванил хIасул бувссар уникальныйсса музей – Аьралий савлугърал музей. Ва ялагу, дуклаки оьрчIащал, ТОКС-рал кьюкьа сакин дурну, хъуннасса даву дурссар Буттал кIанттул цIанийсса Хъун дяъвилий ятIа-тIар бакъа ливтIуминнал цIарду уттара дуллай.
КIицI лаган аьркинни, 1962 шинал цалчинсса дуклаки оьрчIру кьамул бувсса ва школа оьрчIан патриот тарбия дулаврил ца чул бищай кюру хьушиву. 1963 шинал 8-мур майрай бувкшиву Дагъусттаннал ХIукуматрал указ, школалун Буттал кIанттул цIанийсса Хъун дяъвилул Вирттаврал-дагъусттанлувтурал цIа дизлазисса. Тания шиннай 8-мур майрал кьини школалул кьини хIисаврай аьдатравун дагьссар.
Саният ХIажиевал арсурваврал, Асхад ва Ислам ХIажиевхъал, гьамин ва школа къуртал бувссар. Асхадлул СВО-лий шагьидну жан кьурван дурссар, Исламлул – хьхьиривун бюкьлакьисса инсантал ххассал буллай. Январь зуруй вайннал цIарду чирчусса ула школалул чIирай дацIан дурссия.
ХIажи МахIаммадовлул бувсунни танийра школалул дайдирхьусса, Вирттаврал аьпа хIурматрай ябуллалисса аьдат цIакь хьуну душиву, хIакьину Аьралий савлугърал музейраву СВО-лул Вирттаврал чувшивруцIун дархIусса материаллу ххи хьушиву. Бувсунни вара аьралий темалун хас дурсса мероприятияртту дуккаврил шинал лажиндарай чIярусса дувайшиву, гьашинугу, Ватан дуруччул шингу духьувкун, дагьайкунсса къулагъас диркIшиву.
Галина Къараевал, дуклаки оьрчIру ва учительтал барча буллай, кIицI лавгунни школалий мудангу цанницIун ца даркьуну, сантирай дачин дуван аьркиншиву кIулшивуртту дулаврил ва тарбиялул даву, ми кIирагу цакуцну агьамсса душиву.
«МахIачкъала шагьрулул, республикалул, Аьрасатнал бучIантIимунил бияла хIакьинусса дуклаки оьрчIал кIунттихьри. КIулшивурттал чулухагу, рувхIанийшиврул, мяърипатрал чулухагу оьрчIру цуксса лавайсса даражалийн гьаз хьуну бурив, мукссара дюрхъуссар цIа-кьинигу, мукссава гьаз хъанахъиссар аьмну обществалул даражагу», – увкунни ванил.
Саният ХIажиевал цилвамур ихтилатраву барчаллагь увкунни чувшиврий жанну дуллусса жагьилтурал цIарду хъамакъаритаву мурадрай дуллалисса давурттахлу.
«Жул арсурваврал жанну дуллуссар жува бавкьуну, нахIуну, ххуйну яшаврил ххуллий. КIива мукъуйну учин, жува лайкьну яхъананшиврул. Зугу хIарачат буллан аьркинссару, оьрчIрув, ххуйну дуклан. Ххуйну дуклакиминнаяр ххуйсса пишакартал шайсса. Ххуйсса пишакартурал хIарачатрайнур общество хьхьичIуннай шайсса. Щалвагу Аьрасатнал билаятрал арсурваврал СВО-лий чIярусса медальлу, орденну ларсунни. Ми наградарттугу, жул къумашивугу Ххувшаврил мукьай ччяни шюшлашисса кьини дучIаннав!» – увкунни Вирттаврал ниттил.
ПатIимат Рамазанова
