![](https://ilchi.info/wp-content/uploads/2022/03/gajdarbekov3.jpg)
Каспийскаллал шагьрулул 3-мур школалий февральданул 17-нний хьунни Аьрасатнал школьниктурал суккушиндарал «Классные встречи» проектрал лагрулийсса ирглийсса хьунабакьаву. Ва ххуллух, Олимпиадалул гьантригу бухьувкун, дуклаки оьрчIащалсса хьунабакьаврийн оьвкуну бия Олимпий ва Европанал чемпион, Аьрасатнал спортрал лайкь хьусса мастер, ДР-лул спортрал министрнал хъиривчув ХIайдарбек ХIайдарбековлуйн. Ва даврил сакиншинначину бия РДШ-лул (Российское движение школьников) куратор, ва школалул муаьллим, ГьунчIукьатIрал шяравасса Камила ХIажиева.
Чемпионнащалсса хьунабакьаву дайдирхьуна РахIима Сулаймановал (Шахьуйннал шяравасса) каялувшиндаралусса «Ссалам» ансамбльданул къавтIаврия. Гихунмай спортсменнал оьрчIахь бувсуна цалла школ шиннардия, спортравусса цалчинсса ххувшаврия, цалчинсса наградалия. Боксрал чIава цIурттан, 3-мур «А» классрал дуклаки оьрчIан (классрал каялувчи ГьунчIукьатIрал шяравасса ХIажиева Светлана Анасовнар), чемпионнал ккаккан дурна цаппарасса комбинацияртту.
– ХIайдарбек ХIайдарбеков оьрчIал буллусса цалва оьрмулиясса ва спортраясса личIи-личIисса суаллахьхьун, карчI къадурну, хъинну ххуйсса, гьарта-гьарзасса жавабру дуллай ия. ЦIа дурксса спортсменнах ва оьрчIах бурувгукун, вай куннан кув ччянива кIулсса кунмасса асар хъанай бия. Ва куццуй аудитория цалва чулухунмай кIункIу бувангу ччи-ччинаща къашайссар, – тIий бур Камила Загьидиевна.
Чемпион цуварив ва хьунабакьаврил ялув Инстаграмравусса цалла аккаунтрай чичлай ур:
– Барчаллагь сакиншинначитуран. ОьрчIру – молодцы! За кIулсса, ххуйсса тарбия дусса оьрчIру бия, хъинну чIявусса суаллу буллунни, – тIий.
ДакIнийн бутан, «Классные встречи» проектрал лагрулий дуклаки оьрчIру хьунабакьайссар культуралуву, искусствалуву, спортраву, мукунма цаймигу иширттаву цIа дурксса ишккаккултращал, аьлимтуращал. 2019-ку шинал ва проект дурхссар «Образование» цIанилусса Национал проектрал «Социальная активность» цIанилусса Федерал проектравун.
![](https://ilchi.info/wp-content/uploads/2022/03/gajdarbekov4.jpg)