Аьрасатнаву СВО-лул цалчинма Виричу НурмахIаммад ХIажимахIаммадовлул цIанийсса мадраса тIитIинтIишиву бувсунни «Новости» РИА-лухьхьун дуллусса интервьюраву Аьрасатнал Бусурманнал рувхIаний мажлисрал хъунама (ДСМР) ва Аьрасатнал Жяматийсса палаталул член Альбир Кргановлул.
«Аьрасатнал Бусурманнал рувхIаний мажлисрал президиумрал хIукму бунни цIусса территориялий НурмахIаммад ХIажимахIаммадовлул цIанийсса мадраса тIитIин. Ва жагьилтал тарбия баврил ххуллийсса агьамсса давур. Мукунма жул пикри буссар оьрчIащал, бусурман диндалул хъаннищал, жагьилтуращал ва бугьарасса инсантуращал зунсса центргу тIитIин», – увкунни муфтинал.
Шиккува дакIнин бутан, НурмахIаммадлул цIанийсса мадраса тIитIаврил масъала ванал дукIува Луганскаллал Республикалул ХIукуматрал хъунама Сергей Козловлущалсса ихтилатраву гьаз бувна. Ванал тавакъю бувна, Аьрасатнал 4-гу цIусса территориялий зунтIисса имамтал хIадур буллансса мадраса тIитIинсса аьрщи ккаккан дуван ва кIицI лавгуна, му мадрасалун Виричув НурмахIаммадлул цIа дизаву ххарину кьамул бувшиву Луганскаллал, Донецкаллал Республикардал, Херсоннал ва Запорожскаллал областирдал имамтуралгу.
ПатIимат Рамазанова
