Лакрал райондалул ОьрчIал ва чIаважагьилтурал школалун Аьрасатнал Виричув НурмахIаммад ХIажимахIаммадовлул цIа дизансса пикри бувшиву бувсунни райондалул бакIчи Юсуп МахIаммадовлул райондалул депутатътуращалсса батIаврий лакрал агьалинайнсса оьвчавриву.
«Ххирасса лак! Жунма кIулсса куццуй, Украиннавусса хасъсса аьрали операциялуву жан кьурван дурсса НурмахIаммад ХIажимахIаммадовлун дуллунни Аьрасатнал Виричувнал цIа. Муния бувсунни билаятрал Президент Владимир Путиннул Мюхчаншиву дуруччаврил Советрал муданмасса вакилтуращалсса батIаврий.
НурмахIаммад ХIажимахIаммадов увну ур сентябрь зурул 29-нний 1996-ку шинал. Ва чIивинияцIа машхулну ивкIун ур спортрахун, хьхьичIунсса кIанттурду бувгьуну бур каратэлуву ва цаймигу спортрал журардаву. Дуклай ивкIун ур Гъумучиял школалий.
Лакрал миллатрал виричувшиврул цIа мудангу диркIссар. Буттал кIанттул цIанийсса Хъун дяъвилий Совет Союзрал Вирттаврал цIуртти лавсун бур ряххуннал.
Гьужум буллалисса десантрал бригадалуву хъунама лейтенант НурмахIаммад ХIажимахIаммадов хасъсса аьрали операция байбивхьуну цалчинсса гьантрайва увтун ур къинттуллухун, хасъсса мурад биттур баншиврул. Гужру ялтту бувксса муттаэнал вив ливчIун, хIукму бувну бур цIу цайнна ласун. КIусса щаву дирну духьурчагу, битлатисса къаавцIуну ур. Ахиргу, лирчIсса дурагу ца граната пIякь учин дурну, цувагу, цува угьан нанисса неонацистъталгу пIякь учин бувну бур. НурмахIаммадлул бакъассия цамур чаран. Кьюкьлул хъунама ухьувкун, ганан бувчIлай бивкIссар цала роталувусса цума-цагу солдатнан цува эбратну икIан багьлай бушиву.
Ттула ва щала райондалул агьалинал цIания хъуннасса кьурчIишиву кIидачIлай ура жула Виричувнал нитти-буттахь, мачча-гъанцириннахь. НурмахIаммад дуклай ивкIсса Гъумучиял школалул учительтал гьурттусса райондалул депутатътуращалсса ва жяматращалсса батIаврий на хIукму бував Виричувнал цIа абад дуван, Гъумучиял оьрчIал ва чIаважагьилтурал спортшколалун дизан ХIажимахIаммадов НурмахIаммад Энгельслул арснал цIа, Гъумуксса «Вирттаврал чIирайнгу» ванал суратращалсса ула лахъан. БатIаврийсса цинявннал хъин чулий ккавккунни ва пикри», – куну бур Юсуп МахIаммадовлул лакрал жяматрайнсса оьвчаврий.
