Июнь зурул 27-нний «Лезги газетрал» редакциялий Дагъусттаннал миллатирттал мазру ябаврил ва гьаз баврил масъалартту ххал бигьлагьисса «ккуркки стол» хьунни. Ванил сиптачиталгу бия Аьрасатнал Журналистътурал союзрал Дагъусттанналмур отделение, Республикалул Печатьрал ва информациялул агентство уртакьну.
КIицI лавгсса кказитрал хъунама редактор, Журналистътурал союзрал Дагъусттанналмур отделениялул каялувчи МахIаммад Ибрагьимовлул бувсунни Республикалул бакIчи Сергей Меликовлул тапшур бувшиву ниттил мазру ябаврил ххуллий зунсса паччахIлугърал программа сакин дуван. Му программа сакин дуваншиврул бавтIшиву экспертътал, цуку-цукунсса чараннайну тагьар ххуй дуван хьунтIий дуссарив аьщуйн щун буван.
«Мазру бухлаглай бур тIисса ихтилатру жунма хIакьину къааьркинни, миннуя мюнпатгу личIисса бакъар, аьркинни балжисса предложенияртту. Ци буван багьлай буссарив аьщуйн щун буллалисса», – увкунни бакIрайва ванал.
Печатьрал ва информациялул агентствалул каялувчи Арсен Юсуповлул кIицI лавгунни, ниттил мазурдий буккин шайми буссаксса, миллатирттал кказитру итабакьлантIишиву, Аьрасатнал президент Владимир Путиннул, мазру лахьхьаврил тагьар къулай шаву мурадрай, билаятрал Халкьуннал мазурдил кьини дуван тапшур баврийну исват хъанай бур ва къювусса масъалалух къулагъас дуллай бушиву бакI дургьумигу.
«Ккуркки столданул» давриву гьуртту хьунни Печатьрал ва информациялул агентствалул хъунаманал хъиривми Рустам Жалаков ва Аслуттин МахIаммадов, «Дагъусттан» этномедиахолдинграл хъунаманал къуллугъ чIумуйну бартбигьлагьисса АхIмад МахIамаев, республикалул миллатирттал политикалул ва диндалул иширттал министрнал цалчинма хъиривчу Арсен МахIмудов, ДГПУ-лул дагъусттаннал филологиялул факультетрал декан Зайнаб Оьмарова, КIулшиву дулаврил ва элмулул министерствалул отделданул хъунмур Гулизар Идрисова, А. Тахо-Годил цIанийсса ДНИИП-рал директорнал хъиривчу Низами Ссапараьлиев, ниттил мазурдил секторданул хъунама ХIайбулла Вакилов, Дагъусттаннал луттирду итабакьай издательствалул хъунмур Марина Оьмарова, РАН-далул Мазрал ва литературалул институтрал элмийсса зузала Шарапуттин Дашдемиров, миллатирттал кказитирттал редактортал ва журналистътал.
Ва батIаврий хьусса ихтилатру гьануну лавсун, сакин дувансса паччахIлугърал программалуву хьхьичIун ласун аьркинми масъаларттавух ккавккунни Дагъусттаннал Ниттил мазурдил закон кьамул дуваву, шагьрурдайсса садикирттай ниттил мазру лахьхьин буллалисса группарду хIасул буваву, гьарца школалий ниттил мазурдил кабинетру дузал буваву. Мукунма хъин чулий ккавккунни «Яндекс. Переводчикрал» лагрулий сакин буван ниттил мазурдийн таржумартту дуллансса группарду, ниттил мазрал дарсру дихьлахьисса учительтуран ва миллатрал СМИ-лул зузалтран харжру лахъ бансса чаранну лякъаву, ниттил мазурдил ОГЭ-рду ва ЕГЭ-рду школалул программалувун рутаву. Вай циняв кIицI дурсса предложениярттугу, вайннуцIун цаймигу, хъирив лавну, гьарза-гьартану ххал дигьиншиврул цал комиссия хIасул бувансса хIукму бунни. Вайва масъалартту ххал бигьлагьисса чIявусса экспертътал гьурттусса «ккуркки столгу» бавтIун, комиссиялийн тапшур буван мазру ябавриха зунтIисса паччахIлугърал программалувун цуми хьхьичIун ласун багьлай бурив.
«ХIакьину жунма цинявннан бувчIлайгу, чIалайгу бур чара бакъа аьркинну душиву цимурца хIисавравун ларсъсса комплекс программа. КIулшиву дулаврил министерство, школарду, луттирду итабакьай издательстварду, элмийсса институтру ва миллатирттал СМИ уртакьну, жуйрасса тIалавшинна кIулну зун багьлай бушиву. Жува ца хьурча, чарангу лякъинтIиссар, программагу дюрхъуну ва лябуккулий зунтIиссар, ниттил мазру яшаврил ххуллийсса жулва биялагу цIакь хьунтIиссар», – увкунни ахирданий Рустам Жалаковлул.
ПатIимат Рамазанова
