Вай гьантрай Пермь шагьрулий хьусса Аьрасатнал антропологтурал ва этнологтурал конгрессрай гьуртту хьунни Аьрасатнал Виричу НурмахIаммад ХIажимахIаммадовлул нину, МахIачкъалаллал № 54-мур школалул директор Сапижат Мазаева.
Конгресс тIитIлатIисса батIаврий ванил бувсунни 30 миллатрал оьрчIру дуклакисса Дагъусттаннал ляличIишиврия, цинявппа миллатру бавкьуну, нахIуну ялапар хъанай бушиврия.
Шиккува кIицI лаганна, ва бакъасса, кIия дагъусттанчу ялагу гьуртту хьушиву ва конгрессрай: Аьрасатнал Президентнал Администрациялул каялувчинал хъиривчу МахIаммадссалам МахIаммадов ва Миллатирттал иширтталсса буллалисса агентствалул (ФАДН) управлениялул хъунама АьбдулхIамид Булатов.
Сапижат Мазаева хьунабавкьунни Пермь шагьрулул мэр Эдуард Сосниннущал, шагьрулул администрациялул департаментрал вакилтуращал ва школардал директортуращал. Ва хьунабакьаврий МахIачкъалаллал ва Пермь шагьрулул школардал хIала-гьурттуну дуллансса давурттал хIисав-сан дунни.
Сапижат хьунабавкьунни СВО-лий ливтIусса чиваркIуннал кулпатирттащалгу, цIухху-бусу бунни хIукуматрал буллалисса кумаграя, цукунсса дайшишрурду дуссарив, личIлулну вичIидирхьунни ниттихъах ва щахъанних.
Аьрххилия укун бувсунни ванил:
«Ва ттул цалчинсса аьрххия Пермь шагьрулийн, НурмахIаммадма ивссия та шагьрулийн, тайннал Набережнайлий рирщусса суратру гьан дурна ттучIан. Арс сайр буллай ивкIсса кIанттурдайх буклай, ттувувагу жура-журасса асарду бия. Пермский крайрал Ватандалул талаталтрал кулпатирттал комитетрал хъунмур Ирина Ермаковащал архIал цачIусса проектру ххал дигьинсса мурадгу буссия. Жу дукIува дусшиврул гьану бивзссия, Владимир Путиннул вихшаласса инсанталну жул цIарду рищайхту.
ДакIний личIансса хьунни губернатор Дмитрий Махониннущалсса хьунабакьавугу. Жу гьаз бувссия СВО-лий ливтIуминнал кулпатирттан буллалисса кумаграл, ятIа-тIар бакъа бакъа хьуминнал хIакъиравусса ва цаймигу агьамсса масъалартту. Тамансса цаймигу дакIний личIансса хьунабакьавуртту хьунни, тайннал опытгу лаласунсса, ттунма кIулмургу кIибачIинсса аьрххи хьунни. Яла-яларив, Дагъусттаннал ва Пермский крайрал дусшиврийсса арарду цIакь дувансса».
