Дагъусттаннал халкьуннал мазру ва культура дуруччаврил фондрал бувсунни ниттил мазру лахьхьаврил курсирдал хIакъиравусса цала проектрал Дагъусттаннал бакIчинал грант дурххушиву.
Мунийну дузрайн дуккан дан бюхъан тIий бур Дагъусттаннал халкьуннал мазру буруччаву мурадрайсса агьамсса сипта. Проектрал хIадуршиннарал ятапIрал лагрулий Фондрал цIухху-бусу бунни МахIачкъалалив Редукторный поселокрай ялапар хъанахъисса 8-11 классирттал дуклаки оьрчIал ва миннал нитти-буттал дянив. Ванил мурад бия кулпатирттал ниттил мазурдил чулухуннайсса бургаву цукунсса дурив кIул баву. Ахттаршиннарал хIасиллу ццах бутлатиссагу, архIала вихшала дишин буллалиссагу хьунни.
«КIул хьунни цIухху-бусу бувсса 65% ххишаласса оьрчIан цала ниттил маз къакIулну бушиву. Амма нитти-бутталгу, оьрчIалгу маз лахьхьин гъира бушиву бувсунни. ЦIухху-бусулул хIасиллайн бувну, чIалан бивкIунни шагьрулул кIанттурдай ниттил мазру лахьлансса шартIру чара бакъа дузал дан багьлай бушиву. Жу барчаллагьрай буру жуйнна вихшала дурсса грантирттал комиссиялийн ва хIадурну буру зун», – увкунни фондрал вакилнал. ЦIанасса чIумал фонд чялишну зий бур Редукторный поселокрай оьрчIру дуклансса кIанттурду хIадур буллай ва дуккаврил процессран аьркинмур щаллу дуллай.
Дуккаврил группардавун оьрчIру кьамул буллантIиссар цIусса шинал дайдихьулий. Циняв дарсру дикIантIиссар, оьрчIангу, нитти-буттангу къулайсса куццуй, Редукторный поселокрай.
Проектрал каялувчи Шамсият Султанбагьовал бусласимунийн бувну, курсру бикIантIиссар ххюва миллатрал группардаву: яруссаннал, даргиял, лакрал, къумукьнал, лазгиял. Дарсру дикIантIиссар нюжмардий шамийлла, кIи-кIира ссятрайсса.
Сакиншинначитуран бувчIлай бур курсру нитти-буттансса ва оьрчIансса ххишаласса захIмат бушиву. Мунияту, программарду сакин дурну дур тIуркIулийсса, интерактивныйсса ва коммуникативныйсса кьяйдарду ишла дурну. Агьаммур мурад бур оьрчIру дарсирдайн дялахърулийн кунма занансса, ниттил мазрал ва культуралул дунияллий бигьалагансса тагьар хIасул даву.
Фондравуми мукIруну бур, проект щаллу даву республикалийсса личIи-личIисса миллатирттал мазру ябаврил, хъунмур ва ялун нанимур никирттал дянивсса дахIаву цIакь даврил ххуллийсса хъунмасса захIмат бушиврий.
Андриана Аьбдуллаева
