Тталаткьини, февраль зурул 18-нний, цIу миналийсса ЦIуссаккуллал «Непоседа» тIисса оьрчIал багъраву, хьунни Лакку мазрал кьинилун хас дурсса мероприятие. Зал чIюлу бувну бия байрандалун лавхьхьуну. Ккаккиялун дирхьуну дия нукIура жула халкьуннал ичIура ишла дуллай бивкIсса тIахIникIичIу ва цаймигу кьай-кьуй. Лагмара лархъун дия ниттихъал буттукьирттавасса цаннияр ца авурсса чалагъайрду. Мажлис бачин бувмигу, сайки цинявппа зузалтгу эмаратсса чалагъайрдаву бия. Ми майшан тIий, багърал зузалал дурккунни чалагъайлухасса назмугу.
Мажлис байбивхьуна багърал зузалтралгу, оьрчIалгу цачIу щаллу дурсса лакрал гимнрайну. Щала байран най дия лакку мазрай. ОьрчIал дурккунни лакку мазрахасса, Ватандалухасса назмурду, бяст-ччаллий буслай бия лакрал учалартту ва саннарду. Ккаккан дунни оьрчI кIанттуву бахIайсса ва цаймигу жула аьдатру. Ккаккан дунни миллатирттал къавтIавуртту. Лап авурсса дия душваврал щаллу дурсса «Лачакирттал къавтIаву». ОьрчIал нитти-буттал дурну бувкIсса лакку дукрарду, миллатрал янналувусса багърал зузалтрал, къавтIий майшангу куну, дирхьуна столлай, бувсуна гьарица дукралия.
Ниттил мазрал инсаннал оьрмулуву цуксса агьамсса кIану бугьлагьиссарив бусласисса ихтилатру бунни оьрчIал багърал каялувчи Фарида Базаевал ва хозяйствалул бутIулсса байсса ванил хъиривмур Полина Халиловал. Назмурдугу дурккуну, балайрдугу увкунни багърал зузалтралгу. Ва дия унгу-унгусса лакку мазрал байран.
Шиккува кIицI лаган, жу цалчин бакъару ЦIуссаккулув «Непоседа» тIисса оьрчIал багъраву хьусса.
Багърал каялувчи Фарида Ризвановна оьрчIан лакку маз ххира хьун бансса ччимур чаран ляхълай бур. Шикку аьдатравун багьну буссар лакку мазрай ссалам булаву. Багъравун бувкIсса оьрчIалгу, зузалтралгу, лак бакъаминналгума, цалчин «бивзрув» учайссар. Дур шикку ссятру оьрчIру лакку мазрай ккалан бикIайсса. Гьарица утренникрай чара бакъа лакку мазрай ихтилатру байссар. Маз итххяххан баву мурадрай, ишла буллай бур оьрчIансса «ЧIавалачин» журнал. ХIарачатран барачат учайссар. Чара бакъа ххишала хьунтIиссар оьрчIаву ниттил маз лахьхьинсса, муний гъалгъа тIунсса гъира.
Андриана Аьбдуллаева
