[dropcap]Н[/dropcap]оябрьданул 4-нний, Аьрасатнал халкьуннал Цашиврул кьинилун хасну, МахIачкъалалив М. Горькийл цIанийсса Оьруснал театрданул хьхьичIсса майданнив хьунни шадлугърайсса батIаву.
Республикалул каялувшиндарал чулуха дагъусттанлувтал барча булаллисса махъ лавхъунни ДР-лул ХIукуматрал Председательнал цалчинма хъиривчу Анатолий Карибовлул.
Официал бутIа щаллу хьуну махъ республикалул творчествалул коллективирттал ва таксса гьурттучитурал ккаккан дунни хъуннасса байрандалул концерт.
![](http://ilchi.beget.tech/wp-content/uploads/2019/11/71a3d50d4fcb980369728704e21.jpg)
Ва кьини шикку хьуна МахIачкъала шагьрулул Культуралул управлениялул дурсса «Хъуншагьрулул ттуршра симан» («Сто лиц столицы») цIанилусса фестиваль. Мура чIумал арт-майданнив щиривкIуну суратру дихьлай бия шагьрулул оьрчIал художествалул школардал дуклаки оьрчIру ва Жамаллул цIанийсса Дагъусттаннал Художествалул училищалул студентътал. Жагьилтурал дихьлахьисса суратругу дия Дагъусттаннайсса, щалагу Аьрасатнавусса нахIусса, бавкьусса оьрмулиясса, личIи-личIисса ярг-яргсса рангирдайну жулла аьрщи чIалачIи дуллалисса.
[dropcap]М[/dropcap]уния махъ концертрал программа гихуннай дачин дурна Республикалул Халкьуннал творчествалул къатлул сакин дурсса «Цинявппагу цачIу – жува Аьрасатру» тIисса фестивальданул. Муний гьурттушинна дуруна республикалул районнаясса ва шагьрурдаясса творчествалул коллективирттал.
[dropcap]В[/dropcap]а кьини сахIналия Дагъусттаннал халкьуннал личIи-личIисса мазурдий баллай бия буттал улклухсса, ватандалухсса ччавриясса, инсантурал дянивсса дусшивриясса балайрду, ккаккан бюхълай бия личIи-личIисса миллатирттал къавтIавуртту, цалгу цал ххишала тасттикь буллалисса цуксса авадансса культуралул, багьу-бизулул халкь нахIуну ва бавкьуну ялапар хъанай буссарив Аьрасатнал, Дагъусттаннал аьрщарай.