Дагъусттаннал университетрал юридический факультетрай хьунни «Роль религии и религиозных организаций в противодействии употреблению наркотических средств и психотропных веществ в полиэтнической молодежной среде» тIисса республикалул конференция.
Шикку гьуртту хьунни паччахIлугърал властьрал органнал, диндалул ва жяматийсса организациярттал вакилтал, личIи-личIисса регионнаясса экспертътал, студентътал. Конференция тIитIлай, ихтилат бунни Дагъусттаннал Миллатрал политикалул ва диннал иширттал министрнал хъиривчу Рафик Ханзаровлул. Цала ихтилатраву ванал кIицI лавгунни диндалул, кIулшивуртту дулаврил ва цIуллу-сагъшиву дуруччаврил идарарттал цачIу ляхълан аьркиншиву наркотикирттаща бурувччуну бикIансса чаранну. Диндалул организациярттал вакилтурал чIурчIав дунни наркотикирттахун багьсса, ми бакъа бацIан къахъанахъисса инсантурая ка къаларсун, ми тIайла бацIан бан хIарачат бан аьркиншиврий.
Наркотикирттал инсаннал бакIрачIан буцлацисса балардая, обществалун миннуясса нигьачIаврия, жагьилми му ххурххуппалухьхьун къабириян личIлулну бикIан аьркиншиврия бусласисса ихтилатру бунни Дагъусттаннал Муфтиятрал председатель Аьбдулла Салимовлул, Оьруснал православиялул килисалул архиепископ Варлаамлул, иудейтурал общинардал диндалул идаралул председатель Валерий Дибияевлул, психологиялул элмурдал кандидат Евгения Фадеевал, Ставропольлал крайрал Наркотикру ишакаш баврил ялув бацIаву дайсса управлениялул оперуполномоченный, полициялул майор Елена Краснояруженскаял, Ингушетиянал хъунама нарколог Жамбулат Ваделовлул, Дагъусттаннал Наркотикру ишакаш баврил ялув бацIаву дайсса управлениялул профилактикалул отделданул хъунмур Надежда Сайфудиновал, Дагъусттаннал университетрал кафедралул доцент, юридический элмурдал кандидат Аьбдуллатип Аьбдуллатиповлул ва м.ц.
Цинявппа ихтилатчитал дюъ дихьлай бия студентътурай ххуйну къакIулсса инсантурайн вихшала мадишару, щилчIав хъяврин къабан личIлулну бикIияра, къатIухьхьун бириян мабацIару тIий. Буслай бия наркотикирттал жагьилсса инсантурал оьрмурду зия бувсса иширттая.
Ахирданий вузирдал, диндалул ккураннал, медициналул ва ихтиярду дуруччай структурардал личIи-личIисса аудиториярттансса профилактикалул программарду сакин дан аьркиншиврий цалийн бувкIунни мероприятиялул гьурттучитал.
Конференция сакин дурну дия Дагъусттаннал гуманитарный институтрал, Миллатрал политикалул ва диннал иширттал министерствалул кабакьулийну.
Андриана Аьбдуллаева
