Ккуллал райондалул администрациялий хьунни шадлугърал даражалийсса мажлис. Райондалул бакIчи Ажуб ХIусмановлул хасъсса аьралий операциялул гьурттучи, Ккуллал шяравасса Аьлил арс Оьма Чариновлун дуллунни «Участнику специальной военной операции» тIисса АьФ-лул Обороналул министерствалул награда.

Виричунан награда дуллалисса мажлисрай гьуртту хьунни аьралий комиссар Аьли ГъазимахIаммадов, Лакрал ва Ккуллал районнал аьралий комиссариатрал хъунама Ажуб Юсупов, райондалул бакIчинал хъиривчу Анатолий Давдиев.
Ажуб ХIусмановлул, аьраличунал бюхттулсса награда барча дуллай, кIицI лавгунни яхI-къирият ларайсса, Ватандалийн дакI тIайласса къучагъ ушиву.

Ва кьинисса мажлисрай райондалул бакIчинал барчаллагь баян бунни аьралий комиссариатрал зузалтрайн ва вайннал коллективран бахшиш бунни ноутбук.

Шадлугърал мажлисрая махъ Оьма Чариновлухь цIухху-бусу бунни ванан ци кумаг аьркинну буссарив. Ажуб ХIусмановлул махъ буллунни ванал масъалартту щаллу баву цала бакIрайн ласунтIишиву.
Вихьуллал школалул директорнал хъиривчу Оьма Чаринов хъанай ур «Доблесть гор» программалул гьурттучигу. Программалул лагрулийсса ванал насихIатчину ур ДР-лул Халкьуннал Мажлисрал председательнал хъиривчу Камил Давдиев.

Ватандалул мюхчаншиву дуруччаврил масъалартту гьаз хьусса, цалчин мобилизация баян бувсса ппурттуву, Оьма Чариновлул ккаккан бувссар цува хIакьсса патриот ушиву. 2023 шинал ванайн кIусса щаву дирну, хъунмасса хIаллай уссия госпитальлай хъин хъанай. Ази лавгун, ччаннай авцIуну махъгу Оьма зана хьуссия цала аьралий гьалмахтурачIан. ЗахIмат-жапасса иширттаву профессионализм ккаккан даврихлу ва къуллугърал бурж лажин кIялану биттур баврихлу Оьма цимилагу лайкь хьуссар кьиматрайсса наградарттан.

Имара Саидова