Социал-экономикалул лябукку

Сергей Меликовлул тIиму­нийну, социал-экономи­калул лябуккулул бутIуву региондалул хьун дунни къаоьккисса ккаккияртту – ларгсса шинал республикалул бюджет щаллу хьунни 9 млрд къуруширттал.
«Гьалбатта, республикалул социал-экономикалул тагьарданийн асар биян буллай бур инфраструктуралул ссуссукьушивурттал. Му мукуннугу, хIакьину жунма кумаг бунни «Чиркей-Махачкала-Каспийск» щинаххуллу бавриву, къуртал дуллай буру МахIачкъалаллал коллекторданул проект, дузал буллай буру Газпромращалсса ва Россетирдащалсса масъалартту.

АьФ-лул Президентнал тапшурлугъру бартдигьаву

Газрал дузал баву

Жулва хьхьичIсса масъала хъанахъиссар газрал комплексрал кьай-кьуй «Газпром» ПАО-лухьхьун дулаву. Яла мунища бюхъантIиссар аьркинсса давуртту дуллай байбишин, муния махъ жула циняв шяраваллавун газгу буцин. ХIакьину газ бувцуну бур 11 райондалийн.

Электрофикация

Микку жура дуван аьркинсса давуртту хъанахъиссар циняв электросетьру цачIун даву, миннувух заллухъру бакъамигу.
ДР-лий Щалагу Аьрасатнал ОьрчIал центр баву.
– ЖучIава бур хьхьири ва илкинсса кIанттурду. Жу хIадур буллай буру «Артек» ягу «Орленок» кунмасса Центр баврил масъала. Ттул пикрилий, жущава му даву дуван бюхъанссар. Жува аьркинссар Дагъусттанналгу, Ухссавнил Ккавкказуллалгу, щалва билаятралгу оьрчI-бакIуннал къайгъу буллан, – кунни Дагъусттаннал БакIчинал.

МахIачкъалаллал Хьхьирил машлул портрал лябукку

– ЦIана жу зий буру портрал активру республикалул заллушиврийн зана баврил масъаларттаха. На мунил буруккин буллай ура, цанчирча ттун ччай бакъар та-бухьурчагу мунил заллухъруру тIисса инсантурал ми активру бавххуну цанма маэшатран», – кунни республикалул каялувчинал.

КОВИД-19

Сергей Меликовлул бувсунни коронавирусрал инфекциялущалсса талатаврил хIакъиравугу. Республикалул каялувчинал тIимунийну, му иширавугу ккаккияртту къаоьккисса дур. Мунал барчаллагь кунни медициналул зузалтрахь давурттахлу.

Инвестпроектру бартдигьаву

Региондалул лябуккулуву ца яла агьаммур ххуллуну хъанай бур инвестициярттал проектру бартдигьаву. Дагъусттаннал БакIчинал тIимунийну, республикалул властьрал органнал гьануцIакул даххана дурунни Дагъусттаннай инвестициярттацIунсса давуртту. Инвестицияртту зун аьркинссар цалчин ярглий республикалул мурадирттаха, яла – инвестортураха.

– Дагъусттаннал аьркинссар цилла дузал дуван инвестициярттал программа.Ттул пикрилий, давуртту дачин дуллан аьркинни инвестициярттал программалул масъаларттайн чул бивщуну. Жува дузал буванну проектирдал идара. Му идара зунтIиссар нацпроектирдаха ва инвестициярттал проектирдаха, – кунни Сергей Меликовлул.