Февральданул 5-нний Буйнакскалив Шяраваллил хозяйствалул колледжраву хьунни Дагъусттаннал шяраваллил хозяйствалул ва бакIлахърулул министр Мухтарбий Аджековлул пресс-конференция. Журналистътурал суаллахьхьун жавабру дуллай, ванал бувсунни Дагъусттаннал ппиринж бугьултрал 2024-ку шинал ларсун душиву ппиринжрал бакIлахърулул 160 азарда тонна, багъманчитурал ларсун дур 250 азарда тонна ахъулссаннул.

Министрнал тIимунийну, Дагъусттаннал агропромышленностьрал комплексравун хIакьинусса кьини дучIайсса дур миллионнайсса инвестициярду, хаснура тамансса арцу дихьлай бур багъру бавриву ва аьнакIал фермарду давриву.

– ЦIанасса ппурттуву жу Дагъусттаннал Хъус-хъиншиврул министерствалущал цачIу ххал бигьлай буру аьрщарал участокру личIи даврил хIакъиравусса ма­съала. Жун ччай бур зарал бивсса аьрщарайсса ризкьи миккун бакьин ва тай аьрщив ххуй дансса давуртту дуллан, – кунни министр­нал.
Ванал бувсунни 2024-ку шинал Да­гъусттаннал АПК-лул предприятиярттал машан ларсун душиву 609 млн къуруширттансса техника. Миннувасса 492,6 млн къуруш харж дурну дур «Росагролизинг» АО-лийхчил.

Цинярдагу ларсун дур личIи-личIисса 182 техника, миннува — 78 трактор ва хIаллил лакьайсса 7 комбайн.
Мухтарбий Аджековлул бувсунни 2025-ку шинал ахирданийннин дуван тIий бушиву сайки 55 азарда тонна лагайсса ахъулсса ва ахънилсса ядайсса къатри. Ларгмур шинал дурну дур 42 азарда тонна лагай­сса къатри.

Мукунсса, ахъулссаннул ва ахънил­ссаннул 5 азарда тонна ядайсса, къатри дурну дур МахIарамкантуллал райондалий «Сад» КФХ-лул проектрайну, Лаващиял райондалий къуртал дурну дур 1,5 азарда тонна ахънилссаннул ядайсса къатри. Сулайман-Стальскаллал райондалий «Полоса» ООО-лул дурну дур 12,5 азарда тонналунсса къатри.
Министрнал бувсунни 2030-ку шинайннин Дагъусттаннай шяраваллил кIанттурдайсса школардаву тIитIин тIий бушиву 457 агрокласс. Му хъанай бур «Кадры в АПК» федерал проектрал ца бутIану. Мунил мурад бур 2030-ку шинайннин агропромышленностьрал комплекс 95 процентрал зузалтрал дузал баву. ЦIанасса ппурттуву республикалий зий бур 52 агрокласс, шикку школалий дуклаки оьрчIру кIул хъанай бур ризкьичинал, багъманчинал, ветеринарнал ва шяраваллил хозяйствалул сурсатру зана-кьала даврил сянатирттащал. Гьашинугу тIитIин тIий бур мува куццуйсса 28 агрокласс.
Аьрасатнал Шяраваллил хозяйствалул министерствалул кумаг бантIий бур цIусса классру аьркинсса кьай-кьуйлул дузал буван ва аграрий дуккаврил идарар­ттал материал-техникийсса базарду цIу бу­ккан буван.

Министрнал тIимунийну, республикалий тIалавну бур 508 ризкьичи, 211 доярка,173 бухгалтер ва 161 ветеринар, мукунма агрономтал.
Республикалул АПК-лун сянаткартал хIадур байсса ца дуккаврил учрежденияну хъанай бур Буйнакскаливсса Шяраваллил хозяйствалул колледж. ЦIанасса ппур­ттуву шикку дуклай ур 720 студент, вайннава буккан тIий бур найчитал, цIигьуртал ва сварщиктал. Колледжраву дуккаврил программалул лагрулий байбивхьунни хIадур буллан дроннал оператортал, миннал дуручлантIиссар шяраваллил хозяйствалул лухччив, хъуру, ххалазаннурду. Ми сянаткартал тIалавну бикIан тIий бур дяъвилул иширттавугу.
ЦIанасса ппурттуву колледжрал паркраву дур 100-нниха лирчусса техника, хIадур буллай бур шяраваллил хозяйстварттансса механизатортал.
Пресс-конференциялул лагрулий федерал ва республикалул журналистътуран Мухтарбий Аджековлул дуллунни ХIурматрал грамотартту ва барчаллагь увкунни шяраваллил масъаларттах къулагъас дуллай бушиврухлу.

ХIасан Аьдилов