Гьар шинах кунма, гьашинугу Москавливсса Дагъусттаннал диаспора Ххувшаврил кьини Совет Союзрал кIийла Виричу АхIмад-Хан Султаннул ва цIа ларгсса спортсмен-парашютист Наби Аминтаевлул гьаврдай тIутIив дишин, вай дакIнин бичин бавтIунни Новодевичье хIатталлив.

БавтIминнавух бия Москавуллал «Дагъусттан» Культуралул центрданул, Дагъусттаннал Постпредствалул, Мариян Илиясовал цIанийсса «Дараччи» фондрал филиалданул вакилталгу. ЧIявусса бия ЦIувкIуллал жяматгу.
Культуралул центрданул президент, профессор Арсен ХIусайновлул кIицI лавгунни Москавливсса лак бюхттулсса арсурваврал гьаврдайн батIаву ччянира цIакь хьусса аьдат душиву, АхIмад-Хан Султаннул ва Наби Аминтаевлул оьрмурду уттисса никиран чувшиврул ва бюхъу гьунарданул дарсруну бушиву. «Совет Союзрал ссавнил аьралуннал гужирдал хъунмасса бутIа буссар фашизм ххит давриву. АхIмад-Хан Султаннул цIа къакIулсса инсан къаивкIссар авиациялул даврийгу, авиатортуравугу. Дяъви къуртал хьуну махъгу, самолетирттал хIал ккаклай, хъуннасса нигьачIаву ду­сса даву дуллай ивкIссар, 100 самолетрал хIал ккавкссар. Мукунма ракетарттал хIал ккаклай (испытатель) ивкIссар. Ттун ттуна ххуйну кIулссия АхIмад-Хан, хьуссара муначIа ичIувагу. Мунал хIала-гьурттушиву дия ЦIувкIуллал пагьламантуращал. ДакIний дур ва учлачисса кьинигу», – увкунни Арсен ХIусайновлул.
Культуралул центрданул вице-президент, медициналул элмурдал доктор, профессор Астемир Шайхалиевлул кIицI лавгуна, гьарманал бурж бушиву Ватан дуручлай бивкIсса вирттаврал аьпа хIурматрай ябуллангу, миннал оьрмулул хху­ллурдая, гьунардая ялун нанисса никирахь буслангу. Ванал Дагъусттаннал дунияллул халкьуннал лагрулийсса «Национальное достояние и величие» тIисса проектрал цIаниясса ХIурматрал дипломругу, медальлугу дуллунни профессор, Аьрасатнал лайкь хьусса хIакин, Аьрасатнал Элмурдал академиялул член-корреспондент Сяъдуллагь Абакаровлун ва ихIсандалул давурттавух хIаласса активистка ПатIимат Садикьован.
«Сяъдуллагь Ибрагьимовичлул мукьцIалла шинал лажиндарай, ттун кIулссаксса, Ххувшаврил кьини Новодевичье хIатталлив къаивну царагу лях гьан къадунни», – увкуна Астемир Шайхалиевлул.
АхIмад-Ханнул оьрмулул ххуллу гьунарданул ва чувшиврул эбратну хъанахъишиврий чIурчIав дунни Культуралул центрданул Президиумрал член Абас Аьлишаевлулгу.
«АхIмад-Хан Султаннул хасиятрал ххуйшиврул дунияллийцири агьали хIайран бувссар. Чувшиву ххисса ушивруцIун, му инсаншиву дусса, пахру-ххара бакъасса, цала машгьуршиврия ламусравун агьлагьисса инсан ивкIссар», – увкунни Москавливсса ЦIувкIуллал Диаспоралул вакил Шарип Сайдуевлул. МахIачкъалалия бувкIсса, Цалчинмур ЦIувкIуллал оьрчIру тарбия буллай оьрму гьан бувсса бусравсса педагог Аьишат Исяевал бувсунни 45 шинай дарс дихьлахьисса ппурттуву цилва мудангу бусайсса бивкIшиву дуклаки оьрчIахь АхIмад-Ханнул чувшиврия, гьунардая.
Бувсунни АхIмад-Хан Султан Дагъусттаннайн увкIсса чIумал му хIурматрай кьамул увминнавух цила уссу Ися Исяевгу ивкIшиву ва чIявусса агьали Виричунал гьаттайн батIаврия цуппа хъинну ххари хьушиву. Аьрасатнал президентначIасса Дагъусттаннал Постпредствалул хъунаманал маслихIатчи Зоя Хановал дурккунни Абачара ХIусайнаевлул АхIмад-Хан Султаннухасса назму. Дуклаки оьрчIалгу дурккунни назмурду.
АхIмад-Хан Султаннул, Наби Аминтаевлул ва цинявппагу фронтовиктурал аьпалул хIурмат лахъну ябуван жула бурж бушиврия бунни ихтилатру цайминналгу.
Махъру лахълахъими, ца зумату кунма, Вирттаврал цIарду ми­ллатрал цIа бюхттул дурминнал бакIххуттай душиврий чIурчIав дуллай бия. Хъин-хъинсса махъругу лавхъун, гьаврдай тIутIивгу дирхьуну мукьах, рирщуна цачIусса суратругу хъамакъабитулун.
Арсен ХIусайновлул барчаллагь увкунни Новодевичье хIатталливсса Вирттаврал гьаврдай тIутIив дишин бувкIсса лакрал жагьилтурахь, ЦIувкIуллал диаспоралухь.