МахIачкъалалив Р. ХIамзатовлул цIанийсса Миллатрал библиотекалуву хьунни шаэр Бахттун Гъазиевал «Ттиркьюкьи» тIисса луттирал презентация.

Залдануву дия Бахттуннул уттинин итабавкьусса луттирдал выставка. Чичлан ччянива бивкIнугу, Бахттуннул шеърирду халкьуннавун бувккунни махъсса шиннардий. Цалчин бувксса луттирал гьавас бувтссарив, лув-ялув ванил итабавкьунни шеърирдал 12 жуж: «Оьрмулул лахъазантту», «Аьрщарай­сса цIуртти», «Зунттайхсса ссурулккуртта», «Яла лахъимур гъинтнил хьхьу», «Ттул дуниял», «Асардал къюмай», «Хаварду, кьиссарду, пьеса», «ТалихIрал хъири-хъирив», «ЧIирунна-тIутIал ар», «Зунттал щаращул жюржу».
– КуртIну лухччинуву чIярусса шиннардий ялун къаливчусса щаращи кунма, цакуну ялун ливчунни Бахттуннул дакIнил щаращигу. Бахттуннул дакIнива нанисса шеърирду лащан бан бучIир мукунсса щаращуха. Вай сакин хьуну бур цинна ккарксса ххаришивурттая, пашманшивурттая, захIматшиврия ва къабигьасса оьрмулия. Ванил шеърирдава баллай бур уртту-тIутIал чIюлу дурсса лухччайх ва къурдарах ттюнгъану ках тIисса мурчал хIукъулул щурщугу, аьрайн лавгнах ялугьлагьисса ниттихъал аьсивсса аьтIаврил чIурдугу, – чивчуну бур луттирал хьхьичI мукъуву.
Луттирал презентациялийн бувкIун бия Дагъусттаннал шаэртал, Бахттуннул творчество ххирами, ванил гъан-маччами. Дачин дурну бия мероприятие Дагъусттаннал халкьуннал шаэр Мирза Давыдов ва Дагъустта­ннал чичултрал союзрал лакрал секциялул хъунама Супиян Оьма­ров.
Бахттуннул оьрмулул ва захIматрал ххуллия бусласисса, ванил творчествалун кьимат бишлашисса ихтилатру бунни филологиялул ва философиялул элмурдал доктор, ДГПУ-лул профессор, Дагъусттаннал халкьуннал чичу, Дагъусттаннал луттирду итабакьай идаралул редактор, лакку мазрайсса «ЦIубарз» журналданул хъунама редактор, Дагъусттаннал культуралул лайкь хьусса зузала Хизри Илиясовлул, Миллатрал библиотекалул хъунаманал хъиривмур, Дагъусттаннал культуралул лайкь хьусса зузала Сарат Жабраиловал, философиялул элмурдал доктор Асият Буттаевал, М.Илиясовал цIанийсса «Дараччи» ихIсандалул фондрал президент Гульшан Хасаевал, «Дагестан» ГТРК-лул лакку мазрайсса вещаниялул хъунмур редактор, Дагъустаннал культуралул лайкь хьусса зузала Тамара Закарьяевал, чичу, лакку мазрайсса «ЧIавалачин» журналданул редактор Сиянат ХIажиевал, Дагъусттаннал халкьуннал шаэр ПатIимат Рамазановал, лакку мазрал учительтал ПатIимат Аьлиевал ва РайхIанат Завзяновал, Дагъусттаннал Чичултрал союзрал лакрал секциялул хъунама Супиян Оьмаровлул, тарихрал элмурдал кандидат Аьбдуссалам Магьдиевлул, шаэрнал хьхьичIунсса дустал Сарбижамал Буттаевал ва Аминат Камиловал (аьпалухьхьун лавгсса шаэр Сажид Камиловлул кулпат).
Бахттуннун хас бувну цала чивчусса шеърирду бувккунни ЧукIнатусса ХIаммади Маршаевлул ва шаэрнал ссил ПатIиматлул.
Мероприятие ххуй дунни ХIажиаьли ХIажиаьлиевлул, Загьидат Муслимовал, Тамара Закарьяевал, Халисат Батырбековал, Шарапи Ажубовлул щаллу бувсса ххаллилсса лакку балайрдал.
Ахирданий Бахттуннул, цила мероприятие хъун дан, чIарав бацIан бувкIсса цинявннахь дакIнийхтунусса барчаллагьгу увкуну, бахшиш бунни цIуну бувксса луттирду.
Кьурбаннул ва Марзижатлул душ Бахттун Гъазиева бувну бур ЧукIуннал шяраву. Ккурк­лив мяйва классгу бувккуну, зун бивкIун бур ЧукIуннал колхозрал дояркану. Му чIумалва чичайсса бивкIун бур шеърирду, ляхъан байсса бивкIун бур шаммарду. Ми булайсса бивкIун бур «ЦIусса ххуллу», «Ххяххабаргъ» кказитирттайн, «Дусшиву» журналданийн. Яла захIматсса даврихун багьну, кулпатрахасса, оьрчIахасса къайгъурду ялтту бувккун, хъунмасса хIаллай къачичлай бивкIун бур. Бахттуннул шеърирду бур тIабиаьтраха, Буттал кIанттуха, эшкьи-ччавриха. КIицI лаган, Бахттун шаэр ЧукIундалавл душнил душри.