[dropcap]Ф[/dropcap]евраль зурул 21-нний щалагу дунияллий кIицI лагайсса Ниттил мазурдил кьинилуцIун дархIусса ххаллилсса мероприятие хьунни МахIачкъалаллал оьрчIал библиотекалийгу. Ванил сакиншинначитал бия библиотекалул зузалт ПатIимат Салманова ва Заза ХIасанова. Байрандалий гьурттушинна дан бувкIун бия Дагъусттаннал халкьуннал шаэр Ссугъури Увайсов, МахIачкъалаллал 1-мур гимназиялул дуклаки оьрчIру ва учительтал. Библиотекалий ккаккиялун бивхьуну бия Дагъусттаннал шаэртурал ва чичултрал луттирду, чIирттайн лархъун дия ниттил маз лахъа-хъун буллалисса плакатру.
А. Аьбдуллаева
Байрандалул мажлис тIитIлай, ниттил маз буруччин аьркиншиврия, ва масъала хъуннасса къулагъасралун ласун аьркиншиврия бусласисса ихтилат бунни ПатIимат Салмановал.
Ниттил мазрал агьамшивриясса ихтилатгу бувну, Ссугъури Увайсовлул бувккунни оьрчIахь цаппара цала шеърирдугу.
Хъирив МахIачкъалаллал 1-мур гимназиялул дуклаки оьрчIал пасихIну бувккунни ниттил мазурдийсса шеърирду, увкунни балайрду.
ОьрчIру хIадур бувну бия кIулшиву дулаврил хIурматлувсса зузала, лавайсса категориялул учитель, 1-мур гимназиялий лакку мазрал дарс дихьлахьисса ХIабиева Шагьуннул ва Дагъусттан литературалул учитель, 5-мур классрал каялувчи Хизиева Фаридал.
Шиккува кIицI бан, вай учительтурал хIадур бувсса 1-мур гимназиялул дуклаки оьрчIал личIи-личIисса мероприятиярттай, Дагъусттаннал шаэртурал шеърирду бувккуну, мудан хьхьичIунсса кIанттурду бугьайссар.
