Сентябрьданул 16-нний МахIачкъалалив Дусшиврул къатлуву региондалул каялувчи Сергей Меликовлул каялувшиврий хьунни ДР-лул бакIчиначIасса Миллатирттал ва диннал дянивсса арардал советрал заседание.

Шикку ххал бигьунни ялун нанисса ник тарбия давриву, экстремизмалул профилактикалул давриву ва терроризмалул идеологиялийн къарши буккавриву республикалул паччахIлугърал властьрал органнал жяматийсса ва диннал сакиншиннардищалсса хIала-гьурттушиврул масъалартту. БатIаврий гьуртту хьунни Аьрасатнал верховный муфти Талгат Тажуттин, Ставрополлал ва Невинномыскаллал Кирилл, АьФ-лул Президентнал Управлениялул диннал сакиншиннардал Департаментрал хъунама Евгений Еремин ва цаймигу.

Дагъусттаннал бакIчинал барчаллагь кунни Советрал заседаниялул гьурттучитурахь. Ванал бувсунни Дагъусттаннал халкьуннал цашиврул хIакъираву, ми чIярусса шиннардий цачIу бавкьуну, аслахIшиврий ялапар хъанай бушиву ва миннал цинявннал бушиву ца генетикалул код.
Сергей Меликовлул гьаз бунни Советрал ца яла агьаммур масъала – му бур экстремизмалул ва терроризмалул щялусса диндалул идеологиялул профилактика.
– Миннан аьркинссар хьхьарасса регион, хаснува СВО-лул шартIирдаву. Ми бяйкьлакьиссар Ккавкказнаву ва хаснува жула республикалий чIярусса культурарду ва динну душиву жула кIюламур кIанттун ккалли буллалавриву.

ХIакьинусса кьини ца яла нигьачIаву думур ишну хъанахъиссар жагьилтурал радикализация, му миннал дуллай бур экстремизмалул ва терроризмалул идеологтурайхчил социал сетирдаву. Мунийн бувну республикалул властьрал органнал жяматийсса лидертуращал ва граждан обществалул институтирттащал чялиш дуккан дурну дурссар мукунсса журалул материаллайн къаршисса даву», – увкунни Региондалул бакIчинал. Ванал тIимунийну, 2025 шинал 6 зурул мутталий итадаркьуну диркIссар шаназурунниха лирчусса агьалинал радикализациялул профилактикалул материаллу.
БатIаврий махъру лавхъунни мукунма Евгений Ереминнул, ДР-лул миллатирттал политикалул министрнал чIумуйнусса кIанайма, Аьрасатнал Виричу Темирлан АбутIалимовлул ва цайминналгу.