Вай гьантрай МахIачкъалалив хьунни Дагъусттаннал региондалийсса «Справедливая Россия» партиялул отделениялул ирглийсса пресс-конференция. Ва хас дурну дия миграциялул политикалул масъаларттан.

Пресс-конференциялий гьур­тту хьунни «Справедливая Россия» Партиялул отделениялул советрал бюрорал председатель, ДР-лул Халкьуннал Мажлисрал председательнал хъиривчу Камил Давдиев, ДР-лул Халкьуннал Мажлисрал Культуралул, жагьилтурал иширттал, спортрал ва туризмалул комитетрал председатель, «Справедливая Россия» партиялул отделениялул советрал бюрорал секретарь Мурат Пайзуллаев, «Справедливая Россия» партиялул фракциялул председатель НурмахIаммад ХIабибуллаев.
Республикалий ва щалагу билаятрай хIасул хьусса миграциялул масъаларттая балжину бувсунни Камил Давдиевлул.
Партиялул каялувчинал бусаврийн бувну, ялув бацIаву дакъасса ва закондалува бувксса миграциялул масъалартту, халкьуннал харжру, доходру чан шаврийн асар хъанай бур.
«КIулсса куццуй, республикалий строительствалул ва шяраваллил хозяйствалул давурттаву хъинну тIалавну бур мигрантътурал захIмат. ХIакьинусса кьини жучIава захIмат буллалисса чIявуми мигрантътурал цала ляркъусса арцу Ватандалийн тIайла дуклай бур. МуницIун бавхIуну, гьарица шинал Аьрасатнал бюджетрава 17 млрд арцул чан хъанай бур. Вай ишру хIисавравун лавсун, мигрантътурал ляркъусса арцуя 3% налогирттал бугьларчан къулайну хьунссия. Ми арцугу социал масъалартту дузал бавриву дучIи лякъинссия», – увкунни Камил Давдиевлул.
Ванал мукунма кIицI лавгунни мигрантътурал социал ва медициналул масъалартту щаллу баврингу биялсса харж бишин багьлай бушиву.
«ХIисав буллай, махъсса ххюра шинал мутталий чил билаятирттаясса инсантал хъин баврих харж дурну дур 65 млрд арцул. ЧIявуну хьунабакьай, зун увкIсса мигрант кулпатгу, оьрчIругу бувцуну увкIсса. Агана, щала кулпат бухьурчан, шинал лажиндарай вайннан социал выплатарду хIисаврай дуллуну дур 700 азарунния 2,5 миллиондалийн дирсса арцу», – увкунни партиялул каялувчинал.
«Справедливая Россия» партиялул вакилтурал ххал бивгьуну бур вай масъалартту хъин чулий дузрайн буккан баву мурадрайсса цаппара ххуллу-чаранну:
– Гьарица жучIана увкIсса мигрантначIа хIасул дан аьркинссар медициналул страховка.
– Медициналул, кIулшиву дулаврил, транспортрал сферардавусса давуртту, так Аьрасатнал инсантурайн дакъа вихшала къадаву.
– Даврий къазузисса мигрантътурал кулпатру махъунмай цала ватандалийн тIайла буккаву.
– МВД-лул биялдарайн хъар дакъасса миграциялул политика хIасул даву.
– Ихтиярданува увксса мигрант ва мунал щалва кулпат цала ватандалийн тIайла буккаву.
Камил Давдиевлул кIицI лавгунни, вай чаранну чил билаятирттаясса инсантуран дайшишру къадуллай, цинявннан аьмсса закондалул ххуллийсса миграциялул политика дачин даву мурадрайсса бушиву.
Мурат Пайзуллаевлул цала ихтилатраву чIурчIав дунни миграциялул масъалартту республикалун хъуннасса агьамшиву дусса бушиврий.
Миграциялул процессирттал социал-экономикалийн биян буллалисса зараллая був­сунни Нурм­ахIаммад ХIабибуллаевлул.
Ахирданий партиялул вакилтурал жавабру дуллунни журналистътурал суаллахьхьун.

Имара Саидова