Дагъусттаннай Миграциялул къуллугърал зузалт кIюрххил ссят 9-нния маркIачIанмай ссят 8 хьуннин зунтIишиву баян бунни. Вайннал зузи кьини лахъи дуккан дурну дур агьали хIажлийн бачиннин документру чIумуй дузал буваншиврул. Амма цIусса журалул биометриялул загранпаспортру хIадур буван дурусну ца барз хьунтIиссар, мунияту ми анавар буккан буванну тIисса хаварду арцу лякъин ччисса инсантурал хъявринсса хавардур тIий бур кIицI лавгсса идаралул зузалт.
Мубараксса аьрщарайн хIаж буван гьан хьунтIий бур так цIусса журалул паспортращал. «Ттуйн, оьвкуну, баян бувна СВО-лий арс ивкIусса ниттихъавух ттул цIагу чирчушиву, амма цIусса загранпаспорт аьркин багьлай бушиву. ТIалавшинна духьувкун, лавгра документру булун, хъинну хъуннасса учир дия, дачIи кьини ларгуна документру булун, дурусну ца зурува хIадурну бикIантIиссар, хъирив бухьхьу увкунни», – тIий бур Саният ХIажиева.
ДакIнин бутанну, гьашину Дагъусттаннал агьалинал хIаж буван 10 азара инсаннансса квота ккаккан дурну душиву.
«Путевкардал иш укун буссар: 5 азарда путевка машан ларсунни агьалинал, 2500 путевка сенатор Сулайман Каримовлул ларсъссар СВО-лул гьурттучитал ва миннал кулпатру хIажлийн тIайла букканшиврул, лирчIми машан ласун ччиминнан мартрал ахирданийннинсса чIун дуссар», – тIий ур Дагъусттаннал муфтинал кумагчи МахIаммад Кураев.
Шиккува кIицI лаганна, Сулайман Каримовлул аьмну машан ларсшиву 5 азарда путевка, 2500 путевка Аьрасатнал регионнайх дачIинтIишиву, вайкссара – Дагъусттаннангу. ХьхьичIва агьали хIажлийн ххилаххисса «Марва-Тур» компаниялул баян бувна, гьашину ца инсаннал хIаж дянивну 5690 долларданун (тIайланнасса рейс) бацIлай бушиву. Эконом-классрал хIаж (автобусрайгу щябикIанну) – 4990 долларданун. Комфорт-классрал путевкалул багьа буслансса чара бакъашиву дакъар, биялну лахъссагу бур, бунугу, уттира путевкарду къуртал хьушиву баян бувну бур «Муслим-Тур» компаниялул телеграмрай. ХIажлийнсса документру кьамул буллан тIий бур март зурул 30-ннин.
ПатIимат Рамазанова
