Октябрь зурул 19-нний Москавлив Миллатирттал къатлуву хьунни аьдатравун дагьсса жагьилсса хIакинтурал-дагъусттанлувтурал медициналул форум.
Шикку гьуртту хьунни цIанихсса аьлимтал, студентътал, ординатортал, аспирантътал, мукунма «Дагестан» МЦК-лул вакилтал. «Пульс времени и формирование медицины будущего» тIисса жагьилсса пишакартурал ттизаманнул инновациялул форумрал сакиншинначи хьунни Москавуллал Культуралул центр «Дагестан». Мероприятиялул модератор ия Дагъусттан цIу буккан баврил клубрал президент, Дагъусттаннал лайкь хьусса хIакин, Халкьуннал дусшиврул Аьрасатнал университетрал (РУДН) урологиялул кафедралул доцент Фейзула Мингболатов.
Мероприятие тIитIлай цинявппагу хIакинтал ва хъамал барча бунни «Дагестан» МЦК-лул президент, техникалул элмурдал доктор, профессор, аьралий элмурдал академиялул академик Арсен ХIусайновлул. «Дагестан» МЦК-лучIасса Медициналул зузалтрал ассоциациялул каялувчи Гулизар Башанаевал медиктал ирглийсса форумращал барчагу бувну, дуллунни наградартту хьхьичIунсса студентътуран, ординатортуран, аспиратътуран ва хIакинтуран. Вайннан Барчаллагьрал чагъарду ва ХIурматрал грамотартту дия Дагъусттаннал ЦIуллу-сагъшиву дуруччаврил министерствалул ва «Дагестан» МЦК-лул чулуха.
Дагъусттаннай хасъсса аьралий операциялул ветерантуран ва миннал кулпатирттан медициналул кумаг буллай ккаккан дурсса лавайсса даражалул пишакаршиврух ва цIими бушиврух Лазерная хирургиялул клиникалул хъунмур хIакин, остеопатиялул хIакин Тутубава Башанаеван «Дагестан» МЦК-лул чулуха дуллунни «За верность Дагестану» медаль. Шанна шинай хасъсса аьралий операциялий пишалул буржру бартбигьлай ивкIсса аьралий хIакин Муса ХIажиевлун дуллунни Дагъусттаннал ЦIуллу- сагъшиву дуруччаврил министерствалул чулухасса ХIурматрал грамота. Мукуннасса грамотартту дуллунни «Солист» тIисса стоматологиялул клиникалул хъунама хIакин Ризван Илдаровлун, хIакин-дерматолог Диана Нажмуттинован ва хIакин-офтальмолог Мадина Рабаданован. «Дагестан» МЦК-лул чулуха Барчаллагьрал чагъарду буллунни «Dazhaev» тIисса клиникалул хъунама хIакин ХIажи Дажаевлун, «Бьютифл смайл» клиникалул хъунама хIакин Малик Кутараевлун, мукунма Москавуллал личIи-личIисса медициналул вузирдавусса землячествардай каялувшиву дуллалисса студентътуран. Наградарттан лайкь хьусса чIявуми лак бия. Форум хьунни медициналувусса ттизаманнул подходирттая кIул хьун ччисса жагьилсса хIакинтурансса, ординатортуран ва медициналул вузирдал лавайсса курсирдал студентътурансса ххаллилсса площадкану. ДакIнин бутан, укунсса медициналул форум буллай байбивхьуссар 1990-ку шинал.
Андриана Аьбдуллаева
