Укунма гьар кьини бакъа, байраннал гьантрайгу жула хъаннил хъунмур чIун, дукра-къюссулсса буллай, ккухнилий лагай. Къатлуву яла тIааьнмур ва нахIумур кIанугу ккухни бухьунссар.
Мунияту банну ккухнилий ишла бан бучIисса цаппара маслихIатру. Вай циксса бухьурчагу, чув-бунугу буккирчагу, тачIаввагу жухунма къабахчай.
Базаллуву кьюркьусса чIумалла машангу ларсун, шюршуну, мюршгу дурну, пластикалул къуршаву дирхьуну, уртту-щин морозильникраву диширча, ччимур чIумал дуккан дурну, ишла дан шайссар.
***
Сок дан хьхьичI, дачIи ссятрайсса холодильникравугу дирхьуну, яла най дуна микроволновкалуву 20 секундрайсса диширча, цитрусрал ахъулссаннуя бигьану ккири ликкан шайссар.
***
Ишла дуллалаврил дух хьуну чIалачIисса тIаннул къусрал, щинаву щаращигу дурну, бургъилу кьакьан дарча, цIугу ларгун, ранг дучIайссар.
***
ДикI, балугъ бухъайсса тахталуцIа кьанкь къадикIаншиврул, му шюшин хьхьичI, хъаласса цIу бувккун, ягу дачIи дурхъсса лимондалух ссуку дурну хъинссар.
***
ЦIил ягу гьавусса горчицалул ххуйну марцI байссар чугундалул ягълаврду.
***
Раковина ва кафель ххуйну марцI шайссар, ссирка хIаласса щинай шюширча.
***
ЧIиллу ччя-ччяни къуркъа къахъананшиврул ми хъинссар, къусри-гьиссилттащал къадирхьуну, цирдалу дишин.
Чимусул бакI хъунмасса бухьурча, жува ишла бару ганил бачIисса. Холодильникраву бишин хьхьичI ишла къабувмур чимусул бувхъмур кIанайх нагьгу дурккун, биширча, кьакъавкьун, ххуйну яшайссар.
***
Холодильникраву кьанкь къадикIаншиврул хъинссар миву-тиву «активированный уголь» бивхьуну.
***
ЧIавахьултту шюшайни, щинавун марганцовкалул дахьва чIивисса кьепи бичирча, пюрунтру пперхха тIутIи байссар.
***
Урттуй ччех ивкIун, ттангъри хьусса гъухъа-хIажак марцI шайссар, агарда га кIану цIил щинай шюширча. Мугу дайссар кIива щинал стакандалийн ца чIири къуса цIил дирчуну.
***
Аьгъусса духовка марцI шайссар 5 минутIрайсса ссирка дурккун кьабитарча.
***
КIурхру дуклай, ххяхлай къабайбишиншиврул, нувщувух хIала бувара гьивч. Гьивчуву дуссар тIар, кIурхру дуккан къаритайсса этилен тIисса зат.
ХIадур бувссар
Залму АьбдурахIмановал