Уттигъанну Москавлив хьунни аьдатравун дагьсса мюрщи жагьилтурал дянивсса дзюдолул тIиртIу турнир. Шикку ххуйсса ккаккияртту чIалачIи дунни Москавлив ялапар хъанахъисса лаккудушваврал, ссурвал Ххадиджа ва ХIабибат МахIаммадовахъал.ХIабибатлул бувгьунни цалчинсса кIану, Ххадиджал – шамилчинсса.ЧIава спортсменкахъал ппу МахIаммад Вихьлиятуссар. Ва стоматолог-хирургри. Нину Салидат Ккурккуллал шяравасса бур. Вагу ккарччал хIакинни.
Душру, спортраву бакъасса, дуккавривугу итххявхсса бур.
Ххадиджа дуклай бур Москавуллал 1420-мур гимназиялуву марцIну ххювардай, мукунма лавайсса кьиматирттай дуклай бур ХIабибатгу.
Шиккува бусан, 1420-мур гимназиялул гьарица шинах итабакьайссар «Война глазами детей» тIисса, Буттал кIанттул цIанийсса Хъунмасса дяъвилиясса ва билаятрал вирттавраясса дуклаки оьрчIал творчествалул давурттал лу. 2023-ку шинал ва проектраву гьуртту хьуну, Ххадиджал бувгьунни цалчинсса кIану. Буттал кIанттул цIанийсса Хъун дяъвилий Ххувшаву ларсун 80 шин шаврин хасну итабакьлакьисса луттираву ванил сочинениягу дикIантIиссар тIий бур.
Ххадиджал чивчуну бур дяъвилул шиннардий фронтран ярагъ буллай, хьхьу-кьини къаувкуну зий ивкIсса цила ниттил ниттил ттаттая (прапрадедушка), Ххюлуссуннал шяравасса Ибрагьимлул арс МахIаммад Абачараевлуя.
Кулакталли тIий цимурцаннуцIа увсса МахIаммад увкIун ур шярава Двигательстрой (цIанасса Каспийск) буллан. Литейщикнал пишагу лавхьхьуну, дяъвилул шиннардий «Дагдизель» заводрай фронтрансса ярагъ буллай ивкIун ур. Му даву лавайсса даражалий дуллай, МахIаммад производствалул передовик хьуну ур. Мунияту броньгу дуллуну, дяъвилийн къауцлай ивкIун ур. Ца ппурттуву ва, щихьчIав ссихIгу къадурккун, аьрайн нанисса ирглийсса эшелондалувух хIала хьуну ур. Заводрал хъуниминнан хьхьичIунсса зузала акъашиву кIул хьуну, хъирив бувккун бур. Армавирдайн биявайсса кIаная зана увну ур, къинттуллух дуллалимур даву хъиннура агьамсса душиву бувчIин бувну.
Ца-ца чIумал, бувхсса, бавкIусса зузалтраща дарцIан дурсса муххал дурцIусса щурк дайгьин къархьуну, цайнна экьиларгсса ишругу шайсса бивкIун бур. МахIаммадгу мукун ччувччуну, захIматсса цIунцIиярттащал носилкардай увцуну бувкIун бур. Хъин шайхту, цала даврийн зана хьуну ур. 1944-ку шинал хьхьичIунсса зузала МахIаммад Абачараевлуя чIявуну баллан бивкIун бур. Ванан дуллуну дур И.Сталиннул къулбас дурсса Верховный главнокомандованиялул ХIурматрал грамота. Мукуна ва лайкь хьуну ур «За оборону Кавказа», «За Победу в Великой Отечественной войне 1941-1945гг.» медальлан.
ХхюцIалла шин дурну дур кIирисса цехраву зий МахIаммадлул. Ванан дуллуну дур «Герой Социалистического труда» орден, «Почетный гражданин города Каспийск» тIисса бусравсса цIа. МахIаммадлул цIа дуллуну дур Каспийскалий ва ялапар хъанай ивкIсса кIичIираваллин.
МахIаммадлул арс, цIанихсса аьлимчу, техникалул элмурдал доктор, профессор Муса Абачараевлуя чIявучин бавссар. Ва Ххадиджал ва ХIабибатлул ниттил ниттил ппу хъанай ур. Ванал кулпат Ккурклиясса Мисай Аьбдурашидовна хьхьичIунсса учительли. ЧIярусса шиннардий зий буссия Каспийскаллал 8-мур школалий. Ва Дагъусттаннал КIулшивуртту дулаврил отличникри.
Душварал ниттил нину Анжеликагу экономикалул элмурдал кандидатри. Ва дарсру дихьлай бур C.Орджоникидзел цIанийсса Машиностроениялул ва сервисрал колледжраву.
Вана укунсса мархраясса наслу бур жула чIава спортсменкахъул.
ЧIа учинну вайннан ттиния тихуннайгу бюхттулсса ххувшавуртту ва хьхьичIуннайшивуртту.
